స్వర్గీయ ఎన్.టి.రామారావు జీవిత చరిత్ర ఆధారంగా 'ఎన్టీఆర్ బయోపిక్' పేరుతో ఓ చిత్రం తెరకెక్కుతోంది. ఈ చిత్రాన్ని ఎన్టీఆర్ తనయుడు, సినీ హీరో బాలకృష్ణ నిర్మిస్తున్నారు. ఈ చిత్రంలో వివిధ రకాల పాత్రలకు అనేక మంది ప్రముఖ సెలెబ్రిటీలను ఎంపిక చేశారు.. చేస్తున్నారు కూడా. మరోవైపు, ఈ చిత్రం షూటింగ్ కూడా శరవేగంగా సాగుతోంది. ఇప్పటికే తొలి షెడ్యూల్ కూడా పూర్తి చేసుకుంది.
ఈ పరిస్థితుల్లో నందమూరి ఫ్యామిలీలో ఓ విషాదకర సంఘటన జరిగింది. టాలీవుడ్ హీరోలు తారక్, కళ్యాణ్ రామ్‌ల తండ్రి బాలకృష్ణ అన్నయ్య అయిన హరికృష్ణ రోడ్డు ప్రమాదంలో దుర్మరణం పాలయ్యారు. దీంతో నందమూరి ఫ్యామిలీతో పాటు ఏపీ సీఎం నారా చంద్రబాబు నాయుడు ఫ్యామిలీ కూడా ఒక్కటయ్యారు.
ఎలాగూ నందమూరి హీరోలు కలిసి పోయారు కనుక 'ఎన్టీఆర్' చిత్రంలో జూనియర్ ఎన్టీఆర్ కనిపిస్తే చూడాలని ఉందని ఫ్యాన్స్ కోరుకుంటున్నారు. 'ఎన్టీఆర్' సినిమా స్థాయిని పెంచేందుకు బాలయ్య బాబు కాస్త మంచి మనసు చేసుకుని జూనియర్‌కు ఛాన్స్ ఇవ్వాలని అభిమానులు వేడుకుంటున్నారు. మరి అభిమానుల వేడుకోలును బాలయ్య బాబు వింటాడో లేదో వేచిచూడాల్సిందే.
