నా భర్త నాక్కావాలి... అతడి కోసం చివరి రక్తపు బొట్టు వరకూ పోరాడుతా... మాజీ ఎమ్మెల్యే కోడలు

తన భర్తను తన నుంచి దూరం చేశారంటూ కడప మాజీ ఎమ్మెల్యే కందుల శివానందరెడ్డిపై ఆయన కోడలు వాసంతి రెడ్డి ఆరోపణలు చేశారు. తన సమస్యను ఐద్వా మహిళా సంఘం దృష్టికి తీసుకెళ్లింది. అక్కడ ఆమె మాట్లాడుతూ... తనకు భర్త తప్ప వేరే ఏమీ వద్దని చెప్పారు. ఆస్తిపాస్తులు వద్దనీ, అతడితో జీవితాంతం కలిసి ఉండటాన్నే కోరుకుంటున్నట్లు చెప్పారు. అతడి కోసం చివరి రక్తపు బొట్టు వరకూ పోరాటం చేస్తానని ఆమె వెల్లడించారు.

కాగా శివానందరెడ్డి కుమారుడు ఓబుల్ రెడ్డి 2015 ఏప్రిల్ నెలలో వాసంతిని వివాహమాడారు. ఐతే అతడికి అంతకుముందే వివాహమైందనీ, తన మొదటి భార్యకు విడాకులు ఇచ్చి తనను వివాహం చేసుకుంటున్నట్లు తెలిపారని వాసంతి తెలియజేశారు. కానీ గత కొన్ని రోజుల క్రితం ఇంట్లో తన పెద్దవాళ్లు తనను వద్దంటున్నారని చెప్పి తనను విడిచిపెట్టి తన భర్త వెళ్లిపోయారనీ, పెద్ద మనుషులను పంపినా పట్టించుకోవడం లేదని ఆమె వాపోయారు. రాజకీయ పలుకుబడి ఉపయోగించి తనను బెదిరిస్తున్నారని ఆరోపించారు. తన సెల ఫోనుకు అసభ్య పదజాలంతో కూడిన సందేశాలను పంపుతున్నారని అన్నారు. తనకు న్యాయం చేయాలని మహిళా సంఘ సభ్యులకు విజ్ఞప్తి చేశారు.

వెబ్ దునియా తెలుగు వార్తలు, మరిన్ని విశేషాలు పొందేందుకు Mobile APP డౌన్లోడ్ చేసుకునేందుకు ఈ లింకుపై క్లిక్ చేయండి.