అదే గ్రామానికి చెందిన మల్లేష్‌ (36)ను సోమవారం పొలం వద్ద పాము కరిచింది. బాధితుడిని కుటుంబ సభ్యులు మధ్యాహ్నం 2 గంటల సమయంలో జిల్లా ఆస్పత్రికి ఆటోలో తీసుకొచ్చారు. ఆయన్ని ఆస్పత్రి లోపలికి తీసుకెళ్లేందుకు ఆ సమయంలో స్ట్రెచర్‌ లేదు. కనీసం వార్డు బాయ్‌ కూడా రాకపోవడంతో చాలాసేపు ఆయన్ని ఆటోలోనే ఉంచారు. తర్వాత వైద్యుణ్ని కలిసి జరిగింది చెప్పారు. రోగిని ఆస్పత్రి లోపలకు తీసుకొస్తేనే వైద్యం చేస్తానని వైద్యుడు తేల్చి చెప్పాడు. దీంతో చేసేది లేక ఆ కుటుంబంలోని మహిళలు ఆయన్ని లోపలికి తీసుకెళ్లడానికి యత్నించారు.
ఆస్పత్రికి తీసుకొచ్చిన వెంటనే వైద్యం అందించి ఉంటే తమ కుటుంబ పెద్ద ప్రాణం నిలిచేదని కుటుంబీకులు ఆసుపత్రిముందే ఆందోళనకు దిగారు. డీఆర్వో ధర్మాకర్‌, ఆర్డీవో యాదిరెడ్డి, నార్త్‌జోన్‌ ఏసీపీ ఆనంద్‌కుమార్‌ ఘటనా స్థలానికి చేరుకుని విచారించారు. విధుల్లో నిర్లక్ష్యంగా వ్యహరించిన వైద్యుడు అరవింద్‌పై క్రిమినల్‌ కేసు నమోదు చేయాలని ఆదేశించారు.
