తిరుపతిలో ఒక సైకో హల్‌‌చల్‌ చేశాడు. ఎం.ఆర్‌.పల్లి సర్కిల్‌లో ఉన్న ఒక ప్రైవేటు పాఠశాలలోకి వెళ్ళాడు. విద్యార్థులు చూస్తుండగానే ఒంటిపై ఉన్న బట్టలన్నింటినీ విప్పేశాడు. అంతటితో ఆగలేదు... అన్ని తరగతులను తిరిగాడు. సైకో చేష్టలను చూసిన విద్యార్థులు గట్టిగా కేకలు వేశారు. విద్యార్థులతో కలిసి సైకో అరవడం మొదలుపెట్టాడు. అన్ని తరగతులను చుట్టేశాడు. పాఠశాలలోని కొంతమంది అతన్ని పట్టుకునే ప్రయత్నం చేయగా ఫలితం లేకుండా పోయింది. టీచర్లు ఉండే గది వద్దకు వెళ్లాడు. అక్కడ వారితో అసహ్యంగా ప్రవర్తించాడు.
దీంతో కొంతమంది మహిళా టీచర్లే అతడిని పట్టుకుని చెట్టుకు కట్టేశారు. ఆ తరువాత దేహశుద్ధి చేసి ఎం.ఆర్‌.పల్లి పోలీసులకు అప్పజెప్పారు. ఉన్నట్లుండి జరిగిన ఈ సంఘటనలో పాఠశాలలోని విద్యార్థులు భయబ్రాంతులకు గురయ్యారు. గత కొన్నిరోజుల నుంచి ఆ సైకో అదే ప్రాంతంలో తిరుగుతూ ఉండేవాడు. అయితే ఎవరికీ ఎలాంటి హాని చేయలేదని స్థానికులు చెబుతున్నారు. మొదటిసారి అతను ఈ విధంగా ప్రవర్తించాడని స్థానికులు చెబుతున్నారు. సైకో తిరుపతి కోటకొమ్మలవీధికి చెందిన సుబ్బయ్యగా పోలీసులు గుర్తించారు.
