తెలుగుదేశం పార్టీ నేతలు తీవ్ర ఆందోళన చెందుతున్నారు. రాష్ట్ర మంత్రిగా ఉన్న నారా లోకేష్, హిందూపురం ఎమ్మెల్యేగా ఉన్న హీరో బాలకృష్ణల వల్ల టీడీపీకి చెడుపేరు వస్తోందంటూ వారు మథనపడుతున్నారు. వీరివ్యవహారశైలి వల్ల వ్యక్తిగతంగానేకాకుండా, పార్టీ, ప్రభుత్వపరంగా పరవు పోతోందని వారు ఆవేదన వ్యక్తంచేస్తున్నారు.
బుధవారం రాత్రి నంద్యాలలో తాను బస చేసిన హోటల్ వద్ద ఓ తెలుగుదేశం కార్యకర్త చెంపపై హీరో బాలకృష్ణ కొట్టడం సోషల్ మీడియాలో వైరల్ అయింది. దీనిపై టీడీపీ నేతలు ఆందోళన వ్యక్తంచేస్తున్నారు. సీఎం చంద్రబాబునాయుడు ఎంతో కష్టపడుతూ పలు అభివృద్ధి పథకాలు ప్రవేశపెట్టి, రేయింబవళ్లూ కష్టపడుతుంటే, ఇటువంటి ఒక్క ఘటనతో ఎంతో చెడ్డ పేరు వస్తోందన్నారు.
కీలకమైన ఉప ఎన్నికల వేళ, విపక్షాలకు మరో అస్త్రాన్ని ఇచ్చినట్టయిందని, గతంలో 'గౌతమీపుత్ర శాతకర్ణి' సినిమా విడుదల రోజున ఓ అభిమానిని, ఇటీవల తన 102వ చిత్రం ప్రారంభోత్సవం రోజున తన అసిస్టెంట్‌ను బాలయ్య కొట్టిన వీడియోలు చేసిన నష్టం కన్నా, తాజా వీడియో మరింత నష్టాన్ని కలిగించేదని విశ్లేషిస్తున్నారు.
