మే 2న రాజధాని అమరావతి పునర్నిర్మాణానికి శంకుస్థాపన కార్యక్రమం ప్రధానమంత్రి నరేంద్ర మోదీ అధ్యక్షతన జరుగనున్న విషయం తెలిసిందే. ఈ నేపథ్యంలో ముఖ్యమంత్రి చంద్రబాబు నాయుడు రాజధాని ప్రాంత రైతులను ప్రత్యేకంగా ఆహ్వానించారు. మే 2 రాష్ట్ర చరిత్రలో కీలక మలుపుగా నిలుస్తుందని, రాజధాని నగర నిర్మాణం రాష్ట్ర అభివృద్ధిలో కీలకమైన అడుగు అవుతుందని ముఖ్యమంత్రి పేర్కొన్నారు.
ప్రపంచ స్థాయి రాజధాని నగర నిర్మాణం రైతుల త్యాగాల వల్లే సాధ్యమైందని ముఖ్యమంత్రి చంద్రబాబు నాయుడు ఉద్ఘాటించారు. రైతుల దాతృత్వాన్ని రాష్ట్ర ప్రజలు ఎల్లప్పుడూ గుర్తుంచుకుంటారని ఆయన వ్యాఖ్యానించారు. రాజధాని అభివృద్ధికి సంబంధించిన ప్రతి కార్యక్రమంలో, కార్యకలాపాల్లో పాల్గొనాలని, రాజధాని ప్రాంత గ్రామాల రైతులను ఆహ్వానించారు.
సోమవారం, రాజధాని ప్రాంతంలోని వివిధ గ్రామాల రైతులు ఉండవల్లిలోని ముఖ్యమంత్రి చంద్రబాబు నాయుడు నివాసంలో సమావేశమయ్యారు. ఈ సమావేశంలో, ముఖ్యమంత్రి రైతులతో అనేక అంశాలపై చర్చించారు. ల్యాండ్ పూలింగ్ పథకం ద్వారా రైతులు విరాళంగా ఇచ్చిన భూమికి ప్రతిఫలంగా వారికి కేటాయించిన ప్లాట్లకు బ్యాంకు రుణాలు మంజూరు చేసేందుకు ప్రభుత్వం చర్యలు తీసుకుంటుందని ముఖ్యమంత్రి చంద్రబాబు నాయుడు రైతులకు హామీ ఇచ్చారు.
