దేశంలో కరోనా వైరస్ మూడో అల వ్యాప్తి తప్పదని వైద్య నిపుణులు పదేపదే హెచ్చరిస్తున్నారు. ఈ నేపథ్యంలో తెలుగు రాష్ట్రాలు ముందుగానే అప్రమత్తమయ్యాయి. ముఖ్యంగా, ఏపీ సర్కారు మరింతగా ముందు జాగ్రత్త చర్యలు చేపట్టింది. ఇందులోభాగంగా, రాష్ట్రంలోని కొవిడ్‌ పరిస్థితులపై సీఎం జగన్ బుధవారం సమీక్షించారు.
ఈ సమావేశంలో సీఎం జగన్ మాట్లాడుతూ, ‘కరోనాలో మూడో వేవ్‌ సంకేతాల దృష్ట్యా పీహెచ్‌సీలలోనూ ఆక్సిజన్‌ కాన్సన్‌ట్రేటర్లు అందుబాటులో ఉంచాలి. ఆక్సిజన్‌ కాన్సన్‌ట్రేటర్లు, డి-టైప్‌ సిలిండర్లు, ఆక్సిజన్‌ జనరేషన్‌ ప్లాంట్ల నిర్వహణ కోసం జిల్లాల వారీగా ప్రత్యేక విభాగాన్ని ఏర్పాటు చేయాలి. ఏపీ వైద్యసేవలు, మౌలిక సదుపాయాల అభివృద్ధి సంస్థ కార్యాలయంలో ప్రత్యేక సెల్‌ ఏర్పాటు చేయాలి. ఆసుపత్రుల నిర్వహణలో ఆక్సిజన్‌ ప్లాంట్ల నిర్వహణ, ఎలక్ట్రికల్‌, ఏసీ మరమ్మతులు, ప్లంబింగ్‌తో పాటు ఇతర అనుబంధ వైద్య విభాగాల్లో నిపుణులను నియమించాలని సీఎం ఆదేశించారు.
