ఆంధ్రప్రదేశ్ రాష్ట్రంలోని వలంటీర్లకు ఏపీ సర్కారు శుభవార్త చెప్పింది. అమరావతిలో భూమిలేని వలంటీర్ల తల్లిదండ్రులకు నెలవారీ పింఛను ఇవ్వనున్నట్టు వెల్లడించింది. నెలకు రూ.2500 చొప్పున మార్చి ఒకటో తేదీ నుంచి ఈ పింఛను మొత్తాన్ని అందించనున్నట్టు ప్రకటించింది. అయితే, వైకాపా ప్రభుత్వం నియమించిన వలంటీర్లదరికీ ఇది వర్తించకుండా ఒక షరతు విధించింది.
ఇటీవల శ్రీలక్ష్మి అమరావతి గ్రామాలలో పర్యటించారు. ఈ సమయంలో భూమి లేని నిరుపేద కుటుంబాలకు చెందిన వాలంటీర్లు తమకు కూడా పెన్షన్ ఇవ్వాలని శ్రీలక్ష్మిని అభ్యర్థించారు. ఈ విషయం తెలుసుకున్న వెంటనే శ్రీలక్ష్మి దీనిపై సానుకూలంగా స్పందించి.. ప్రభుత్వం దృష్టికి తీసుకువెళ్లారు. సీఎం జగన్‌కు ఈ సమస్యను వివరించగా.. ఆయన సానుకూలంగా స్పందించి గ్రీన్ సిగ్నల్ ఇచ్చారని తెలిపారు.
అమరావతి గ్రామాలకు చెందిన నిరుపేద వాలంటీర్ల కుటుంబాలకు పింఛన్లు అందించాలని సీఎం జగన్‌ ఆదేశించారు. మార్చి 1 నుంచి ప్రతి నెలా భూమి లేని నిరుపేద గ్రామ వాలంటీర్ల కుటుంబాలకు పింఛను రూ.2,500 మంజూరు ఇస్తారు. ఈ నిర్ణయంపై వాలంటీర్లు హర్షం వ్యక్తం చేస్తున్నారు.
