ప్రభుత్వం తెచ్చిన పాత నోట్లు రద్దు ప్రజలకు చుక్కలు చూపిస్తోంది. చేతిలో పెద్ద నోట్లు ఉన్నా ఏమీ కొనలేని దయనీయ పరిస్థితి. సరే ఆ నోట్లను మార్చుకుందామని బ్యాంకులకు వెళితే బ్యాంకు అధికారులు తాపీగా కౌంటర్లలో కూర్చుని కాఫీలు తాగుతూ కబుర్లు చెప్పుకుంటున్నారు. ఎంతమాత్రం ప్రజల గోడును పట్టించుకోవడంలేదు. ఉదయం 6 గంటలకే ప్రజలు క్యూల్లో నిలబడి ఉంటే, బ్యాంకు అధికారులు మాత్రం తాపీగా 10 గంటలకు వస్తున్నారు.
మరోవైపు ATMలు ఎక్కడా తెరుచుకోలేదు. దీనితో పరిస్థితి మరీ ఇబ్బందికరంగా మారింది. ఇంకోవైపు కొత్తగా వచ్చిన రూ. 2000 నోటు తీసుకెళితే... ఆ నోటుకు చిల్లర లేదంటూ షాపులు చీదరించుకుంటున్నాయి. మొత్తమ్మీద ప్రజలకు మోదీ నిర్ణయం చుక్కలు చూపిస్తోంది. బ్యాంకర్లతో కేంద్ర ఆర్థిక మంత్రి నిరంతరం సమీక్షలు చేస్తున్నట్లు చెపుతున్నా... అది వాస్తవ రూపంలో మాత్రం కనిపించడంలేదు. ప్రజలు నోట్ల కష్టాలు వర్ణించనలవికావడంలేదు.
