టీవీ 9 మాజీ సీఈఓ రవి ప్రకాష్‌కు హైదరాబాద్ హైకోర్టులో గట్టి ఎదురుదెబ్బ తగిలింది. తనపై హైదరాబాద్ సైబర్ క్రైమ్ పోలీసులు నమోదు చేసిన కేసులు రాజ్యాంగ విరుద్ధమంటూ ఆయన తరపు న్యాయవాదులు లంచ్ మోషన్ పిటిషన్ దాఖలు చేసి తక్షణ విచారణను కోరారు. దీన్ని స్వీకరించిన హైకోర్టు... తక్షణ విచారణకు నో చెప్పింది. అలాగే, రవి ప్రకాష్ కోసం దాఖలైన ముందస్తు బెయిల్ పిటిషన్‌ను కూడా హైకోర్టు తిరస్కరించింది.
పైగా, ఇందుకోసం పోలీసులు విధించిన గడువు కూడా బుధవారం ఉదయంతో ముగిసింది. దీంతో రవి ప్రకాష్‌ను పోలీసులు అరెస్టు చేయవచ్చనే ఊహాగానాలు బలంగా వినిపిస్తున్నాయి. అయితే, గత మూడు నాలుగు రోజులుగా ఆయన ఎక్కడ ఉన్నదీ ఎవరికీ అంతుచిక్కడం లేదు. దీంతో ఆయన ఆచూకీని కనుగొనేందుకు పోలీసులు ముమ్మరంగా ప్రయత్నిస్తున్నారు.
