దేశ చరిత్రలో ఎన్నడూ లేని విధంగా మహిళలకు సంబంధించిన రూ.27 వేల కోట్ల రుణాలు మాఫీ చేసి ముఖ్యమంత్రి వైఎస్ జగన్మోహన్ రెడ్డి తాను మహిళలకు ఇచ్చిన మాటను నిలబెట్టుకున్నారని, రాష్ట్రంలో అమలు చేస్తున్న ప్రతీ పథకం మహిళా సాధికారత కోసమేనని డిప్యూటీ సీఎం పాముల పుష్ప శ్రీవాణి అభిప్రాయపడ్డారు.
27 వేల కోట్ల రుణమాఫీ చేసిన ప్రభుత్వం దేశంలో ఎక్కడా లేదని తెలిపారు. డ్వాక్రా మహిళలకు రుణాలను మాఫీ చేస్తామని అన్న మాట ప్రకారం సీఎం జగన్ 4 విడతల్లో ఆ మొత్తాన్ని చెల్లిస్తున్నారని వివరించారు. కరోనా మహమ్మారి ప్రబలిన ఈ కష్టకాలంలో వైయస్సార్ ఆసరా పథకాన్ని అమలు చేసి 88 లక్షల మంది మహిళల నమ్మకాన్ని సీఎం నిలబెట్టారని కితాబిచ్చారు.
అమ్మ ఒడి, జగనన్న విద్యా దీవెన, వసతి దీవెన పథకాలతో పిల్లలను చదివించుకునే అవకాశాన్ని మహిళలకిచ్చారన్నారు. దిశ చట్టం తో మహిళా రక్షణకు దేశానికే దిశా నిర్దేశం చేశారని,30 లక్షల ఇళ్ల పట్టాలతో దేశానికే ఆదర్శంగా నిలిచారని ప్రశంసించారు.
