ఏపీ ముఖ్యమంత్రి, వైకాపా అధినేత జగన్మోహన్ రెడ్డిని లక్ష్యంగా చేసుకుని విమర్శలు గుప్పించారు. మిస్టర్ జగన్.. నువ్వొక సంస్కార హీనుడివి. వెళ్లి ఒకసారి భారతి మేడం గారిని అడుగు.. ఏనాడైనా ఆవిడని మేం దూషించామా? అని పవన్ నిలదీశారు. జగన్ మాదిరిగా తన తండ్రి ముఖ్యమంత్రి కాదన్నారు.
తాడేపల్లిగూడెంలో నిర్వహించిన వారాహి విజయ యాత్రలో పవన్ మాట్లాడుతూ, ముస్లింలకు తాను వ్యక్తిగతంగా ఇష్టమన్నారు. కానీ, తాను బీజేపీ వైపు ఉన్నానని నమ్మడం లేదన్నారు. కానీ, జగన్ ముస్లింలకు షాదీ ముబారక్ తీసేశారని గుర్తు చేశారు. మీ మాతృభాషలో స్కూల్స్ పెట్టలేక పోయారన్నారు. నేను మాత్రం బీజేపీతో ఉన్నానా లేదా అన్నది మీకు అనవసరమని, మీకు న్యాయం చేస్తానా లేదా అని చూడండన్నారు.
ఏపీలోని వలంటీర్ వ్యవస్థ అధిపతి ఎవరో చెప్పాలని పవన్ డిమాండ్ చేశారు. చాలాచోట్ల వలంటీర్లు ప్రజలను వేధిస్తున్నారన్నారు. వలంటీర్లు అందరూ అలాంటి వారు కాదని, కానీ ఈ వ్యవస్థలోనూ కొందరు కిరాతకులు ఉన్నారని ఆరోపించారు. వలంటీర్లు తనకు సోదర సమానులన్నారు. వారి పొట్టకొట్టాలనేది తన ఉద్దేశ్యం కాదన్నారు. వలంటీర్లు అందరూ చెడ్డవారు అని తాను చెప్పడం లేదని ఈ వ్యవస్థ ఎలా పని చేయాలో చెబుతున్నానని, వేతనం లేదా ఎలాంటి ప్రతిఫలం ఆశించకుండా పని చేసే వాళ్లే వలంటీర్లు అని, డబ్బులు తీసుకునే వారిని వలంటీర్లు ఎలా అంటారని ఆయన నిలదీశారు.
