తాజాగా వెలుగులోకి వచ్చిన ఈ వివరాలను పరిశీలిస్తే, ఈ గ్రామానికి చెందిన చలమల నాగేశ్వరరావు, సౌందర్య దంపతులకు ఇద్దరు కుమార్తెలున్నారు. వారిలో చిన్న కుమార్తె కీర్తి (11 నెలలు) శనివారం ఇంట్లో టీవీ ముందు కూర్చుంది. ఆ సమయంలో తల్లిదండ్రులు ఇంటి బయట ఉన్నారు.
చిన్నారి టీవీ పక్కనే ఉన్న కేబుల్‌ తీగ లాగడంతో టీవీ ఆమెపై పడింది. వెంటనే గమనించిన తల్లిదండ్రులు పాపను ఐతవరం గ్రామంలోని ఓ ఆర్‌ఎంపీ వద్దకు తీసుకువెళ్లగా అప్పటికే మృతి చెందింది. త్వరలో తొలి పుట్టినరోజు వేడుకను ఘనంగా నిర్వహించాలని భావిస్తున్న తరుణంలో పాప అనంత లోకాలకు వెళ్లిపోవడంతో తల్లిదండ్రులు బోరున విలపించారు.
