అగ్నేయ నైరుతి బంగాళాఖాతంలో తీవ్ర అల్పపీడనం నెలకొంది. ఈ కారణంగా 24 గంటల్లో శ్రీలంక - తమిళనాడు తీరాల దిశగా పయనిస్తుంది. ఈ కారణంగా బుధవారం, గురువారం రోజుల్లో ఏపీ కోస్తా, రాయలసీమ జిల్లాల్లో భారీ వర్షాలు కురుస్తాయని భారత వాతావరణ శాఖ అమరావతి కేంద్రం వెల్లడించింది. ప్రస్తుతం ఆగ్నేయ - నైరుతి బంగాళాఖాతంలో కొనసాగుతుందని, ఇది క్రమంగా బలపడి వాయుగుండంగా మారే అవకాశం ఉందని భారత వాతావరణ సంస్థ అంచనా వేసింది. రానున్న 24 గంటల్లో పశ్చిమ వాయువ్య దిశగా పయనించి శ్రీలంక - తమిళనాడు తీరాల దిశగా వస్తుందని పేర్కొంది.
దీని ప్రభావంతో ఏపీ కోస్తా జిల్లాలు, రాయలసీమ, యానాం ప్రాంతాల్లో ఈ నెల 11, 12వ తేదీల్లో అక్కడక్కడ భారీ వర్షాలు కురిసే అవకాశం ఉందని ఐఎండీ వెల్లడించింది. ఈ నెల 11వ తేదీ నుంచి 13వ తేదీ వరకు బంగాళాఖాతంలోకి జాలర్లు వేటకు వెళ్లరాదని హెచ్చరికలు జారీ చేసింది. కాగా, తీవ్ర అల్పపీడనం ప్రభావంతో ఏపీ దక్షిణ కోస్తాలో జిల్లాల్లో వాతావరణం ఒక్కసారిగా మారిపోయింది. ఆకాశం మేఘావృతమైవుంది. చాలా ప్రాంతాల్లో గాలులు వీస్తున్నాయి. దాంతో చలి పెరిగింది.
మరింత బలపడిన అల్పపీడనం - నేడు, రేపు ఏపీలో వర్షాలు
బంగాళాఖాతంలో ఏర్పడిన అల్పపీడనం మరింతగా బలపడింది. నైరుతి బంగాలాఖాతాన్ని ఆనుకుని ఆగ్నేయ బంగాళాఖాతంలో మంగళవారం అల్పపీడనం ఏర్పడిందని ఏపీ విపత్తుల నిర్వహణ సంస్థ (ఏపీఎస్డీఎంఏ) వెల్లడించింది. దీని ప్రభావం కారణంగా వచ్చే 24 గంటల్లో ఇది పశ్చిమ మధ్య వాయవ్య దిశగా పయనిస్తూ శ్రీలంక - తమిళనాడు తీరాలకు చేరువగా వస్తుందని వివరించింది.
ఈ తీవ్ర అల్పపీడనం ప్రభావంతో ఈ నెల 11వ తేదీ బుధవారం నాడు నెల్లూరు అన్నమయ్య, చిత్తూరు, తిరుపతి జిల్లాల్లో కొన్ని చోట్ల తేలికపాటి నుంచి మోస్తరు వర్షాలు కురిసే అవకాశం ఉందని పేర్కొంది. అలాగే, ఏలూరు, కృష్ణా, బాపట్ల, ప్రకాశం, పల్నాడు, గుంటూరు, ఎన్టీఆర్ జిల్లాల్లో అక్కడక్కడా తేలికపాటి వర్షాలు కురిసే అవకాశం ఉందని వాతావరణ శాఖ తెలిపింది.
ఈ నెల 12వ తేదీన నెల్లూరు, తిరుపతి, చిత్తూరు, అన్నమయ్య, సత్యసాయి, కడప జిల్లాల్లో మోస్తరు వర్షం కురిసే అవకాశం ఉందని, ప్రకాశం, పల్నాడు, నంద్యాల, కర్నూలు, బాపట్ల జిల్లాల్లో తేలికపాటి వర్షాలు కురుస్తాయని ఏపీఎస్డీఎంఏ తెలిపింది.
