భద్రాచలం మావోయిస్టులు పోస్టర్ల చెంత అమర్చిన ప్రెషర్ బాంబు పేలడంతో పూజారి గూడెం గ్రామానికి చెందిన బ్రహ్మనాయుడు అనే యువకుడు గాయపడ్డాడు. చర్ల శివారు లెనిన్ కాలనీ సమీపంలోని మామిడితోట దగ్గర ఈ ఘటన చోటు చేసుకుంది. వివరాలలోకి వెళ్లితే, ఈనెల 13 న రాజకీయ ఖైదీలను విడుదల చేయాలనే డిమాండ్ లో మామిడి తోట వద్ద పలు చెట్లకు మావోయిస్టు పార్టీ చర్ల - శబరి ఏరియా కమిటీ పేరుతో పోస్టర్లు వెలిశాయి.
ఆలం పూజారిగూడెం నుంచి లెనినా కాలనీ వైపు తన ద్విచక్రవాహనంపై వెళ్తున్న బ్రహ్మనాయుడు రోడ్డు పక్కన చెట్టుకు ఉన్న పోస్టర్ గమనించాడు. అందులో ఏముందో తెలుసుకోవాలనే ఉత్సాహంతో వాహనంపైనే పోస్టరు ఉన్న చెట్టు చెంతకు వెళ్ళి మ్యాటర్ చదువుతుండగా, అకస్మాత్తుగా బాంబు పేలడంతో ఎగిరి రోడ్డుపై ప‌డ్డాడు. రక్తస్రావంతో ఉన్న అతడిని హుటాహుటిన బాటసారులు చర్లలోని ఓ ప్రైవేటు ఆసుపత్రికి తరలించారు.
