నంద్యాల ఉప ఎన్నికల ప్రచారంలో సినీ తారలు సందడి చేస్తున్నారు. ఇప్పటికే వైకాపా తరపున నటి రోజా, తెలుగుదేశం తరపున హిందూపురం ఎమ్మెల్యే, నటుడు బాలకృష్ణ ఎన్నికల ప్రచారంలో పాల్గొన్నారు. తాజాగా టీడీపీ తరపున హాస్యనటుడు వేణుమాధవ్ నంద్యాల ఉప ఎన్నికల ప్రచారంలో పాల్గొన్నాడు. ఈ సందర్భంగా భూమా కుటుంబం తన సొంత కుటుంబం లాంటిదన్నాడు.
మంత్రి భూమా అఖిలప్రియ తన అన్న బిడ్డ అని, తనకు కూమార్తెలాంటిదని వేణుమాధవ్ అన్నాడు. వైసీపీ అధినేత జగన్ చేస్తున్న ప్రచారం టీడీపీకి కలిసొస్తుందని చెప్పుకొచ్చాడు. ఈ సందర్భంగా వైసీపీ ఎమ్మెల్యే రోజాపై వేణుమాధవ్ సెటైర్లు విసిరాడు. తన బిడ్డ అఖిలప్రియపై కామెంట్ చేసిన రోజాపై వేణు మాధవ్ తీవ్రస్థాయిలో విరుచుకుపడ్డారు.
తాను ప్రచారానికి రాలేదని... టీడీపీకి ఎంత మెజార్టీ వస్తుందో చూద్దామనే వచ్చానని అన్నాడు. ఈ ఎన్నికల్లో భూమా బ్రహ్మానందరెడ్డిని అఖండ మెజార్టీతో గెలిపించాలని వేణుమాధవ్ విన్నవించాడు. ప్రత్యర్థులకు డిపాజిట్లు కూడా దక్కని విధంగా బ్రహ్మానందరెడ్డిని గెలిపించాలని ఓటర్లను వేణు మాధవ్ ఈ సందర్భంగా విజ్ఞప్తి చేసుకున్నాడు.
