కూరల్లో గుత్తివంకాయ కూడా ఉంది. నిగనిగలాడుతూ.. ఘుమఘుమలాడుతోంది. ఆవురావురు అంటూ ఓ వంకాయను నోట్లో పెట్టుకున్నాడు. అంతే షాక్ అయ్యాడు.. అది గుత్తొంకాయ కాదు.. ఎలుక.. చిన్న చిట్టెలుక. ఇంకేమైనా ఉందా.. ఒళ్లు వణికింది.. గుండె దడ పెరిగింది.. ఆ ఎలుకను అలాగే పట్టుకుని హోటల్ నిర్వాహకులకు చూపించాడు.. బయటకు వచ్చాడు.
తాజాగా వెలుగులోకి వచ్చిన ఈ వివరాలను పరిశీలిస్తే, వరంగల్‌‌కి చెందిన రమేశ్‌ భార్య హన్మకొండ సుబేదారిలోని రోహిణి ఆస్పత్రిలో చికిత్సపొందుతోంది. ఆమెకు భోజనం తీసుకెళ్లేందుకు హోటల్‌కు వెళ్లి ఆర్డర్ ఇచ్చారు. ఇంతలో తనకూ ఆకలి కావడంతో తాను కూడా భోజనం చేసేందుకు కూర్చొన్నాడు.
ఈ క్రమంలో గుత్తొంకాయ కూరలో ఎలుక ప్రత్యక్షమైంది. వంకాయ ముక్క అని భావించి నోట్లో పెట్టుకున్న క్రమంలో ఎలుకను గుర్తించాడు. ఈ క్రమంలో ఆయన కొద్దిపాటి అస్వస్థతకు గురై వాంతులు చేసుకున్నారు. అనంతరం హోటల్ యాజమాన్యం నిర్వాకంపై ఆగ్రహం వ్యక్తంచేస్తూ పోలీసులకు ఫిర్యాదు చేశాడు. దీనికి సంబంధించిన వీడియో సోషల్ మీడియాలో చక్కర్లుకొడుతోంది.
