ప్రస్తుతం మనకు ఏది కావాలన్నా సరే హోం డెలివరీ చేసే సదుపాయం అందుబాటులోకి వచ్చింది. ఇందుకోసం ఫ్లిప్‌కార్ట్, అమెజాన్, జొమాటో, స్విగ్గీ వంటి అనేక యాప్‌లు అందుబాటులోకి వచ్చాయి. కిరాణా సరుకులు, ఫుడ్ డెలివరీ కోసం ప్రత్యేకంగా యాప్‌లు ఉన్నాయి. ఇపుడు కొత్తగా పెట్రోల్ హోం డెలవరీ కోసం ఓ కొత్త యాప్ అందుబాటులోకి వచ్చింది. అయితే, దీన్ని ప్రభుత్వం రంగ పెట్రోల్ సంస్థ అయిన బీపీసీఎల్ ఆవిష్కరించింది.
బీపీసీఎల్ యాప్ ద్వారా ఆన్‌లైన్‌లో బుక్ చేసుకుంటే ఇంటివద్దకే డోర్ డెలివరీ చేస్తామని తెలిపింది. ఈ విధానాన్ని తొలుత ఏపీ ఆర్థిక రాజధాని విజయవాడ నుంచే శ్రీకారం చుట్టింది. ఈ విషయాన్ని బీపీసీఎల్ సౌత్ డీజీఎం రాఘవేంద్ర రావు వెల్లడించారు. హోం డెలివరీ చేసే సమయంలో ఫెసో క్యాన్‌తో ఇంధనాన్ని సరఫరా చేస్తామన్నారు. ఇందులో చేయడం వల్ల ఎలాంటి ప్రమాదాలకు ఆస్కారం ఉండదని చెప్పారు.
కాగా, పెట్రోల్ హోం డెలివరీ కార్యక్రమాన్ని ఏపీ, తెలంగాణ డీజీఎంలు రాఘవేంద్ర రావు, భాస్కరరావులు మంగళవారం విజయవాడలోని గాంధీ నగర్ పెట్రోల్ బంకు వద్ద లాంఛనంగా ప్రారంభించారు. అలాగే, గాంధీ నగర్ పెట్రోల్ బంకులో సిబ్బంది లేకుండానే స్కాన్ చేసి సెల్ఫ్‌గా పెట్రోల్ నింపుకునే విధంగా ఏర్పాట్లు చేసినట్టు ఆయన తెలిపారు.
