ఉద్యోగులకు శుభవార్త. ఈ ఏడాది భారత సంస్థలు ఉద్యోగుల జీతాలు పెంచబోతున్నాయి. సగటున 7.7 శాతం చొప్పున వేతనాలు పెరుగుతాయని ఎఆన్ సర్వేలో తేలింది. పనితీరు మెరుగ్గా ఉన్న వారి వేతనాలు 1.6 రెట్లు ఎక్కువ ఉండే అవకాశం ఉందని ఈ సర్వే అంచనా వేసింది. 2020లో కంపెనీలు చెల్లించిన వేతనాల కంటే సగటున ఇది 6.4 శాతం అధికం కావడం గమనార్హం.
ఈ ఏడాది ప్రపంచ దేశాల్లో భారత్‌లోనే ఉద్యోగుల వేతనాల పెంపు మెరుగ్గా ఉండనుండటం విశేషం. ఈ-కామర్స్, వెంచర్ క్యాపిటల్ సంస్థలు 10.1 శాతం ఇంక్రిమెంట్లు ఇస్తాయని.. తర్వాత టెక్నాలజీ రంగ సంస్థలు 9.7 శాతం చొప్పున జీతాలు పెంచుతాయని.. ఐటీఈఎస్ కంపెనీలు 8.8 శాతం, ఎంటర్‌టైన్మెంట్ అండడ్ గేమింగ్ కంపెనీలు 8.1 శాతం, ఫార్మా సంస్థలు 8 శాతం చొప్పున ఈ ఏడాది వేతనాలు పెంచే అవకాశం ఉంది. ఆర్థిక సంస్థలు 6.5 శాతం చొప్పున, ప్రొఫెషనల్ సర్వీసెస్ 7.9 శాతం చొప్పున వేతనాలు పెంచే అవకాశం ఉందని అంచనా.
దేశంలోని 1200కుపైగా కార్పొరేట్ సంస్థలు, 38 పరిశ్రమల నుంచి ఈ సర్వే వివరాలను సేకరించింది. కరోనా లాక్‌డౌన్ ప్రభావం నుంచి కోలుకోవడానికి ఆతిథ్యం, మౌలిక వసతులు, రిటైల్, ఇంజినీరింగ్ సర్వీసులు లాంటి రంగాలు ఇంకా ఇబ్బందులు పడుతున్నాయని ఈ సర్వే గుర్తించింది.
