ప్రపంచాన్ని కరోనా వైరస్ వణికిస్తోంది. చైనాలోని వుహాన్ నగరంలో పురుడుపోసుకున్న ఈ వైరస్ ఇప్పటికే 65 దేశాలకు పాకింది. ఈ వైరస్ బారినపడి ఇప్పటికే 3 వేల మంది వరకు ప్రాణాలు కోల్పోగా, వేలాది మందికి ఈ వైరస్ సోకింది. పైగా, ఈ వైరస్ గాలిద్వారా శరవేగంగా విస్తరిస్తోంది.
ఈ కరోనా కలకలంతో ప్రపంచ వ్యాప్తంగా మాస్కులకు విపరీతమైన డిమాండ్ ఏర్పడింది. ప్రజలంతా ఒక్కసారిగా మాస్కుల కోసం ఎగబడటంతో మాస్కుల కొరత ఏర్పడింది. ముఖ్యంగా, హైదరాబాద్‌ నగరంలో ఓ పాజిటివ్ కేసు నమోదు కావడంతో తెలుగు రాష్ట్రాలకు కూడా కరోనా భయం పట్టుకుంది. కరోనా నుంచి కాపాడుకోవడానికి మాస్క్‌లను ధరిస్తున్నారు.
అయితే, కరోనా వైరస్ మాస్క్ ధరించిన వ్యక్తికి వ్యాప్తి చెందదా? అనే ప్రశ్న ప్రస్తుతం ఉత్పన్నమవుతోంది. ఈ ప్రశ్నకు వైద్య నిపుణులు చెబుతున్న సమాధానం ఏంటంటే.. ఏ వైరస్ అయినా గాలి ద్వారా త్వరితగతిన వ్యాప్తి చెందే అవకాశాలున్నాయని.. కరోనా అందుకు మినహాయింపేమీ కాదన్నారు. అయితే, మాస్క్ ధరించిన వ్యక్తులు తమ చేతులతో పొరపాటున కూడా ముక్కును, నోటిని తాకొద్దని.. చేతులను శుభ్రంగా కడుక్కున్న తర్వాతే తాకాలని వైద్యులు సూచిస్తున్నారు.
