ఇంగ్లండ్ క్రికెటర్ అలిస్టర్ కుక్ అంతర్జాతీయ క్రికెట్‌కు స్వస్తి చెప్పాడు. ఈ నెల 7వ తేదీన భారత్‌తో జరగనున్న ఐదో టెస్ట్ మ్యాచ్ తన క్రికెట్ జీవితంలో చివరి మ్యాచ్‌గా కుక్ అధికారికంగా ప్రకటించాడు. ఇంగ్లాండ్ క్రికెట్ చరిత్రలో అత్యుత్తమ ఆటగాళ్లలో కుక్ ఒకరిగా రికార్డు సృష్టించాడు. రెండు దశాబ్ధాలుగా క్రికెట్ ఆడిన కుక్ అద్భుతమైన రికార్డులను సాధించాడు.
అత్యంత పిన్న వయస్సులో టెస్టుల్లో పదివేల పరుగుల మైలురాయిని దాటిన ఆటగాడిగా కుక్ సచిన్ పేరిట ఉన్న రికార్డును బద్ధలు కొట్టాడు. సచిన్ 31 ఏళ్ల 326 రోజుల వద్ద ఈ మైలురాయిని బద్ధలు కొడితే.. కుక్ 31 సంవత్సరాల 157 రోజుల్లోనే ఈ ఘనతను సాధించాడు. అంతేకాదు ఇంగ్లాండ్ తరపున పదివేల పరుగులు పూర్తి చేసిన తొలి ఆటగాడిగానూ నిలిచాడు. అలాగే 160 టెస్టుల్లో 12,254 పరుగులు చేశాడు. ఇందులో 32 శతకాలు, 56 అర్థసెంచరీలు వున్నాయి.
ఇక 92 వన్డేల్లో 3204 పరుగులు చేశాడు.. ఇందులో 5 సెంచరీలు, 19 అర్థసెంచరీలు ఉన్నాయి. అత్యథిక వ్యక్తిగత స్కోరు 137. ఇక పొట్టి క్రికెట్‌లో 4 మ్యాచ్‌లు ఆడి.. 61 పరుగులు చేశాడు. మార్చి 1, 2006లో టెస్ట్ క్రికెట్‌లోకి కుక్ అడుగుపెట్టాడు. 2012లో ఆండ్రూ స్టాస్ నుంచి సారథ్య బాధ్యతలు స్వీకరించిన కుక్.. 24 టెస్టుల్లో జట్టుకు కెప్టెన్ వ్యవహరించి 24 ఏళ్ల తర్వాత యాషెస్ సిరీస్‌లో ఆసీస్‌ను ఓడించి సిరీస్‌ అందించాడు.
