భారత క్రికెట్ జట్టు కెప్టెన్ విరాట్ కోహ్లీ, బాలీవుడ్ హీరోయిన్ అనుష్క శర్మల వివాహం ఇటలీలో జరుగనున్నట్టు సమాచారం. ఈ పెళ్లి కోసం అనుష్క శర్మ కుటుంబ సభ్యులతో కలిసి ఇటలీకి వెళ్లినట్టు బీ-టౌన్ వర్గాల సమాచారం.
వాస్తవానికి కోహ్లీ - అనష్కలు ప్రేమలో ముగిపోయారు. వీరిద్దరిమధ్య మిగిలింది ఇక వివాహం మాత్రమే. అయితే, గత నాలుగు రోజులుగా వీరిద్దరి గురించి ఓ వార్త చక్కర్లు కొడుతోంది. అదేంటంటే.. వీరిద్దరి వివాహం ఇటలీలో జరుగబోతున్నది. ఈ ఊహాగానాల నేపథ్యంలో అనుష్క శర్మ గురువారం రాత్రి తన కుటుంబ సభ్యులతో కలిసి ముంబై ఎయిర్‌పోర్ట్‌లో మీడియా కంటపడింది.
దీంతో ఆమె చుట్టూ చేరిన మీడియా ఇటలీ వెళుతున్నారా? అంటూ ప్రశ్నలు కురిపించింది. అనుష్క మాత్రం ఎలాంటి సమాధానం చెప్పకుండా థ్యాంక్యూ అని చెప్పి వెళ్లిపోయారు. అనుష్క తల్లిదండ్రులను పెళ్లి గురించి ప్రశ్నించినా వారు కూడా ఎలాంటి వివరాలు వెల్లడించలేదు. మరోపక్క ఇరు కుటుంబాల నుంచి స్నేహితులు, సన్నిహితులకు ఆహ్వాన పత్రికలు వెళుతున్నట్లు సమాచారం.
ఈ ఊహాగానాలపై అనుష్క ప్రతినిధి స్పందిస్తూ ఇప్పుడిప్పుడే పెళ్లి జరగదని ప్రకటించారు. అయినా వీరిద్దరి వివాహ విషయమై చర్చలకు తెరపడటంలేదు. విరాట్, అనుష్క స్పందిస్తే కానీ ప్రస్తుత ఊహాగానాలపై ఓ క్లారిటీ వచ్చేలా లేదు.
