అమెరికాలో ఓ యువతి ఓ భారతీయ యువకుడితో ఇష్టపడి శారీరక సంబంధం పెట్టుకుని ఆపై అతనిపైనే లైంగిక వేధింపుల కేసు పెట్టింది. వివరాల్లోకి వెళితే.. అమెరికాలోని కాలిఫోర్నియా యూనివర్శిటీలో చదువుతున్న 19 ఏళ్ల యువతి తనతో కలిసి చదువుతున్న 20 ఏళ్ల భారత విద్యార్థి అర్మన్ ప్రేమ్‌జీ‌తో శారీరక సంబంధం పెట్టుకుంది. అయితే అతడు తనను బలవంతంగా లాస్‌ఏంజెల్స్‌లోని హాస్టల్‌కు తీసుకెళ్లి.. అత్యాచారానికి పాల్పడినట్లు కేసు పెట్టింది.
కానీ దీనిపై కేసు నమోదు చేసుకున్న పోలీసులు సీసీటీవీ ఆధారాలను బట్టి.. భారతీయ విద్యార్థి ఏ పాపం చేయలేదని తేల్చేశారు. సీసీటీవీ వీడియోలో ఆ యువతే సదరు యువకుడిని హాస్టల్‌కు చేయి పట్టుకుని తీసుకెళ్లింది. ఇంకా ఈ ఘటన సందర్భంగా ఆ యువకుడు మందు కొట్టినట్లు ఆ యువతి ఫిర్యాదులో పేర్కొంది. కానీ ఆ వీడియోలో యువతి మద్యం తాగినట్లు తేలింది.
