2019 యేడాదికి పత్రికా స్వేచ్ఛ అంశంలో 180 దేశాలకు ర్యాంకులు కేటాయించగా అందులో భారత్‌కు 140వ ర్యాంకును ఇచ్చింది. భారత్‌లో పాత్రికేయులపై దాడులు రోజురోజుకూ పెరిగిపోతున్నాయని, పాత్రికేయులపై పోలీసులు, మావోయిస్టులు, నేర ముఠాలు, అవినీతి రాజకీయ నాయకులు హింసాత్మక దాడులు చేస్తున్నారని, జర్నలిస్ట్‌లను బెదరిస్తున్నారని సంస్థ నివేదికలో తెలిపింది.
భారత్‌లో 2018వ సంవత్సరంలో తమ వృత్తిలో భాగంగా విధులు నిర్వహించినందుకు ఆరుగురు జర్నలిస్టులు దారుణ హత్యకు గురైనట్టు గుర్తుచేసింది. మరో జర్నలిస్టు మృతి అంశంలో అనేక అనుమానాలు ఉన్నాయని చెప్పుకొచ్చింది. జాతీయ మీడియాతో పాటు ప్రాంతీయ మీడియా వ్యక్తులపైన దాడులు జరుగుతున్నాయని, గ్రామీణ ప్రాంతాల్లో పనిచేస్తున్న జర్నలిస్టులపై దాడులు ఎక్కువగా జరుగుతున్నట్లు నివేదిక వెల్లడించింది.
కాగా, ఈ ర్యాంకుల్లో నార్వే తొలి స్థానాన్ని నిలబెట్టుకోగా, ఫిన్లాండ్, స్వీడన్, నెదర్లాండ్స్‌ వరుసగా రెండు, మూడు, నాలుగు స్థానాల్లో నిలిచాయి. భారత్‌కు పొరుగు దేశాలైన పాకిస్థాన్‌ 142వ ర్యాంకులో చేరగా, బంగ్లాదేశ్‌‌కు 150వ ర్యాంకు వచ్చింది. చివరి నాలుగు ర్యాంకులు విషయానికి వస్తే.. తుర్క్‌మెనిస్తాన్‌‌కు 180వ ర్యాంకు, ఉత్తర కొరియాకు 179వ ర్యాంకు, చైనాకు 177వ ర్యాంకు, వియత్నాంకు 176వ ర్యాంకులో ఉన్నాయి.
