అగ్రరాజ్యం అమెరికా వైపు హరికేన్ దూసుకొస్తుంది. కనివినీ ఎరుగని రీతిలో హరికేన్ ఇర్మా బీభత్సం సృష్టించనుందని వాతావరణ శాఖ అధికారులు తెలిపారు. ఇర్మా ప్రభావంతో గంటకు 209 కిలోమీటర్ల వేగంతో పెనుగాలులు వీచే ప్రమాదం ఉన్నట్లు నేషనల్‌ హరికేన్ సెంటర్‌ అధికారులు చెబుతున్నారు. 25 సెంటీమీటర్ల నుంచి 51 సెంటీమీటర్ల మేరకు వర్షపాతం నమోదయ్యే ప్రమాదం ఉంది.
ఫ్లోరిడాలో నెలకొన్న పరిస్థితులపై చర్చించేందుకు అమెరికా అధ్యక్షుడు డొనాల్డ్ ట్రంప్ అధికారులతో ప్రత్యేక సమావేశం నిర్వహించారు. అనంతరం విధ్వంసకర తుఫాను ముంచుకొస్తోందని ట్రంప్ ట్విట్టర్‌లో ప్రజలను హెచ్చరించారు. ఆస్తి పోతే మళ్లీ సంపాదించుకోవచ్చు. కానీ ప్రాణాలు తిరిగిరావని.. ట్రంప్ అధికారులకు హితవు పలికారు. వీలైనంత త్వరగా ప్రజలను సురక్షిత ప్రాంతాలకు తరలించాల్సిందిగా సూచించారు.
