ఫేస్‌బుక్ ప్రియుడిని వెతుక్కుంటూ పాకిస్తాన్ వెళ్లి అంజూ వీసా గడువును పాకిస్థాన్ ప్రభుత్వం పొడగించింది. భార్త, ఇద్దరు పిల్లలు, కుటుంబాన్ని వదిలివేసి తన ఫేస్‌బుక్ ప్రియుడి కోసం పాకిస్థాన్ వెళ్లిన రాజస్థాన్ వివాహిత అంజు.. ప్రస్తుతం పాక్ ప్రియుడిని పెళ్లి చేసుకుని అక్కడే ఉంటున్నారు. ఈమెకు పాక్ ప్రభుత్వం మంజూరు చేసిన వీసా గడువు ఈ నెల 20వ తేదీతో ముగియనుంది. దీంతో ఈ వీసా గడువును పాక్ ప్రభుత్వం పొడగించింది. మరో యేడాది పాటు తమ దేశంలో ఉండేందుకు వీలుగా ఈ వీసా గడువును పొడగించింది.
రాజస్థాన్ రాష్ట్రానికి చెందిన అంజూ... భారత్‌లోని తన భార్త, ఇద్దరు పిల్లలు, అత్తమామలు, మరిది, తల్లిదండ్రులను వదిలిపెట్టి ఫేస్‌బుక్‌లో పరిచయమైన పాకిస్థాన్ ప్రియుడి కోసం దేశ సరిహద్దులను దాటి వెళ్లింది. సరిహద్దులను దాటిన తర్వాత తన స్నేహితుడిని కలుసుకోవడంతో పాటు పాకిస్థాన్‌‍ను చూసేందుకు వచ్చినట్టు ఆరంభంలో చెప్పింది. ఆ తర్వాత రెండు రోజుల్లోనే ఆమె పాక్ ప్రియుడిని పెళ్లి చేసుకుని, తన పేరును కూడా ఫాతిమిగా మార్చుకున్నారు.
మరోవైపు, అంజూపై మొదటి భర్త జైపూర్‌ పోలీసులకు ఫిర్యాదు చేశాడు. తనకు విడాకులు ఇవ్వకుండానే అంజూ చేసుకున్న రెండో పెళ్లి చెల్లదని, ఆమెతో పాటు నస్రూల్లాపై చర్యలు తీసుకోవాలని తన ఫిర్యాదులో పేర్కొన్నాడు. దీంతో అంజూతో పాటు ఆమె రెండో భర్తపై పోలీసులు కేసు నమోదు చేశారు.
