అమెరికాలో భారత సంతతికి చెందిన కోపైలెట్‌ను ఆ దేశ పోలీసులు అరెస్టు చేశారు. చేతులకు బేడీలు వేసి మరీ తీసుకెళ్లారు. అతని పేరు రుస్తు భగ్వాగర్. భారత సంతతి కోపైలెట్. శాన్‌ఫ్రాన్సిస్కో విమానాశ్రయంలో అతడిని కాక్‌పిట్ నుంచే పోలీసులు అదుపులోకి తీసుకోవడం గమనార్హం. ఆయన డెల్టా ఎయిర్‌లైన్స్‌లో విధులు నిర్వహిస్తున్నాడు.
డెల్టా సంస్థకు చెందిన బోయింగ్ విమానం మిన్నియాపోలీస్ నుంచి బయలుదేరి శాన్‌ఫ్రాన్సిస్కోలో ల్యాండ్ అయింది. విమానం ఆగిన వెంటనే పోలీసులు కాక్‌పిట్‌లోకి దూసుకొచ్చి భగ్వాగర్‌ను అదుపులోకి తీసుకున్నారు. ఈ హఠాత్ పరిణామానికి ప్రయాణికులతో పాటు విమాన సిబ్బంది ఆశ్చర్యపోయారు. పైగా కో పైలెట్‌ చేతులకు బేడీలు వేసి తీసుకెళ్లడం గమనార్హం.
భగ్వాగర్ తప్పించుకునే అవకాశం ఉందని భావించిన పోలీసులు... ఎంతో గోప్యంగా ఈ అరెస్టు ప్రక్రియను పూర్తి చేశారు. చిన్నారులపై లైంగిక వేధింపుల ఆరోపణలపై ఈ యేడాది ఏప్రిల్ నుంచి విచారణ జరుగుతోంది. ఈ క్రమంలో ఆదివారం అతడిని అరెస్టు చేశారు. డెల్టా సంస్థ ఈ అరెస్టుపై స్పందించింది. అనైతిక ప్రవర్తనను తమ సంస్థ ఏమాత్రం సహించదని, అతడిపై వచ్చిన అభియోగాలు తమను దిగ్భ్రాంతికి గురిచేశాయని పేర్కొంది. ఆ కోపైలెట్‌ను విధుల నుంచి సస్పెండ్ చేస్తున్నట్టు ప్రకటించింది.
