ప్రముఖ సోషల్ మెసేజింగ్ యాప్ వాట్సాప్‌లో వినూత్న ఫీచర్లను అందుబాటులోకి తెచ్చింది. మొబైల్‌ యాప్‌లో ఇప్పటికే డార్క్‌ మోడ్‌ ఫీచర్‌ను లాంచ్ చేసిన వాట్సాప్‌ తాజాగా వాట్సాప్‌ వెబ్, డెస్క్‌టాప్‌ యాప్‌ల కోసం డార్క్‌ థీమ్‌ ఫీచర్‌ను బుధవారం విడుదల చేసింది.
కాగా, ప్రస్తుతం వాట్సాప్‌ను ప్రపంచవ్యాప్తంగా 200 కోట్ల మందికి పైగా వినియోగిస్తున్నారు. యూజర్లకు ఆకట్టుకునేందుకు డార్క్‌ థీమ్‌తో పాటు యానిమేటెడ్‌ స్టిక్కర్లు, క్యూఆర్‌ కోడ్స్‌ తదితర నూతన ఫీచర్లను ఆవిష్కరించింది.
వినియోగదారులు ఇప్పుడు తమ క్యూఆర్‌ కోడ్‌ను స్కాన్‌ చేయడం ద్వారా కొత్త కాంటాక్టులను కూడా యాడ్‌ చేసుకునే ఆప్షన్‌ ఉంది. అందరికీ అర్థమయ్యేలా భావ వ్యక్తీకరణకు స్టిక్కర్లు ఉపయోగపడనున్నాయి. గ్రూప్‌ వీడియో కాల్‌లో ఉన్నప్పుడు మనకు నచ్చిన వ్యక్తిపై నొక్కితే ఆ వీడియో మరింత స్పష్టంగా కనిపించేలా మార్పులు చేసింది.
ఇకపోతే, 'వాట్సాప్‌లో యూజర్లు ఛాటింగ్‌ చేసే సమయంలో భావ వ్యక్తీకరణకు స్టిక్కర్ల వినియోగం పెరుగుతున్నది. ప్రతిరోజూ కోట్లాది మంది వీటిని ఇతరులకు పంపిస్తున్నారు. ప్రస్తుతం మేం తీసుకొచ్చిన యానిమేటెడ్‌ స్టిక్కర్లు యూజర్లకు మరింత ఫన్‌ను అందిస్తాయని' వాట్సాప్‌ ఒక ప్రకటనలో పేర్కొంది.
