పెళ్లి పీటలెక్కిన వధువు ఆపండి అంటూ పెద్దగా కేక వేసి పక్కకు తప్పుకుంది. దీంతో పెళ్లికొచ్చిన అతిథులు, ఇరు కుటుంబాల పెద్దలు షాకయ్యారు. ఈ ఘటన తెలంగాణలోని వనపర్తి జిల్లా కొత్తకోట మండలంలోని ఒక గ్రామంలో జరిగింది. ఈ గ్రామానికి చెందిన వధువు కుటుంబం కొన్నాళ్ల క్రితం మహారాష్ట్ర వెళ్లి షోలాపూర్‌లో స్థిరపడింది.
స్వగ్రామానికి చెందిన అబ్బాయితో పెద్దలు ఆమెకు పెళ్లి కుదిర్చారు. నిన్న ఉదయం 8:10 గంటలకు ముహూర్తం కాగా, ఇరు కుటుంబాల వారు ఉదయాన్నే పెళ్లి మండపానికి చేరకుని ఏర్పాట్లు పూర్తి చేశారు. వధూవరులిద్దరూ పీటలపై కూర్చున్నారు.
పురోహితుడు వేదమంత్రాలు చదువుతూ పెళ్లి తంతు పూర్తి చేస్తున్నాడు. ముహూర్తం రానే వచ్చింది. వధువు తలపై జీలకర్ర, బెల్లం పెట్టాల్సిందిగా వరుడిని పురోహితుడు కోరాడు. అతడు చేయి పైకెత్తాడు. అంతే.. వధువు ఒక్కసారిగా ఆపండి అని కేకపెట్టింది. ఈ పెళ్లి తనకు ఇష్టం లేదంటూ పెళ్లి పీటల నుంచి పక్కకు తప్పుకుంది.
అప్పటివరకు మేళతాళాలతో సందడిగా కనిపించిన కళ్యాణ మండపం .. కాసేపు నిశ్శబ్దంగా మారిపోయింది. ఏం జరిగిందో అర్థంకాక పురోహితుడు, ఇరు కుటుంబాల పెద్దలు, పెళ్లికొచ్చిన అతిథులు షాకయ్యారు.
