ఈ నేపథ్యంలో దినకరన్ రిసార్ట్‌లో ఉంచిన 19 మంది ఎమ్మెల్యేల్లో ఐదుగురు ఎమ్మెల్యేలు జంప్ అయినట్టు తెలుస్తోంది. మిగిలిన ఎమ్మెల్యేలు కూడా నేడో రేపో చేజారిపోనున్నారని తెలుస్తోంది. ఈ నేపథ్యంలో అప్రమత్తమైన దినకరన్ వారిని కాపాడుకునేందుకు హైదరాబాద్ తరలించనున్నట్టు సమాచారం. ఈ మేరకు హైదరాబాదులో ఏర్పాట్లు చేసినట్టు తెలుస్తోంది.
అదేసమయంలో తాజా రాజకీయ పరిణామాలపై చర్చించేందుకు దినకరన్ బెంగుళూరు జైలులో ఉన్న శశికళను చూసేందుకు వెళ్లనున్నారు. అక్రమాస్తుల కేసులో బెంగళూరులోని పరప్పణ అగ్రహార కేంద్ర కారాగారంలో శశికళ శిక్షను అనుభవిస్తున్న విషయం తెల్సిందే. ఈ సందర్బంగా ఈ నెల 12వ తేదీన ముఖ్యమంత్రి పళనిస్వామి నిర్వహించనున్న అన్నాడీఎంకే సర్వసభ్య సమావేశంతో పాటు ప్రస్తుత రాజకీయాలపై శశికళతో ఆయన చర్చించనున్నారు.
