కేవలం గడ్డం కారణంగా ఓ యువకుడి పెళ్లి ఆగిపోయింది. గడ్డం తీసెయ్యాలని తండ్రి కోరగా, కాబోయే భార్య మాత్రం గడ్డం ఉండాల్సిందేనంటూ పట్టుబట్టింది. దీంతో ఆ యువకుడు ఎటూ తేల్చుకోలేకపోయాడు. చివరకు ఈ పెళ్లి ఆగిపోయింది. ఈ విచిత్ర సంఘటన తమిళనాడు రాష్ట్రంలోని కోయంబత్తూరు జిల్లాలో జరిగింది. తాజాగా వెలుగులోకి వచ్చిన ఈ వివరాలను పరిశీలిస్తే,
కోయంబత్తూరుకు చెందిన ఓ పారిశ్రామికవేత్త కుమారుడు ఫ్యాషన్ కోసం గడ్డం పెంచసాగాడు. రెండు నెలల క్రితం ఆ యువకుడికి ఓ యువతితో వివాహ నిశ్చితార్థం జరిగింది. సోమవారం ఉదయం పెళ్లి జరగాల్సి ఉంది. ఈ నేపథ్యంలో ఆ పారిశ్రామికవేత్త ఆదివారం కుమారుడిని పిలిచి సెలూన్‌కు వెళ్లి క్షవరం చేసుకోవాల్సిందేనని హుకుం జారీ చేశారు. ఎంత నచ్చజెప్పినా తండ్రి వినకపోవడంతో ఆఖరికి షేవింగ్ చేసుకునేందుకు ఆ యువకుడు బయలుదేరాడు.
ఇంతలో అతడి కాబోయే భార్య ఫోన్ చేసింది. మాటల మధ్యలో విషయం తెలుసుకున్న ఆ వధువు.. గడ్డం ఉంటేనే బావుంటుందని, ఇప్పుడు గడ్డం తీసేస్తే తన స్నేహితుల ముందు ఫ్యాషన్‌గా కనిపించరని నచ్చచెప్పింది. అందువల్ల షేవింగ్ చేయించుకోవద్దని గారాలుపోయింది. దాంతో ఆ యువకుడు షేవింగ్ చేయించుకోకుండానే ఇంటికెళ్లాడు.
అంతేగాక తన కాబోయే భార్య కూడా షేవింగ్ వద్దని చెప్పిందని తెలపడంతో ఆ తండ్రి పట్టుదల మరింత పెరిగింది. దాంతో అతను కుమారుడితో గొడవపడ్డాడు. దీని గురించి బంధువులు నచ్చచెప్పినా ఫలితం లేకపోయింది. ఆఖరికి తన కుమారుడి వివాహం ఆగిపోయినందున ఎవ్వరూ రావద్దంటూ ఆ పారిశ్రామికవేత్త స్నేహితులు, సన్నిహితులు, బంధువులకు సోమవారం వేకువజామున ఫోనులో మెసేజ్ పంపించాడు. చివరకు ఆ యువకుడి పెళ్లి ఆగిపోయింది.
