అన్నాడీఎంకే అధికారిక ఎన్నికల గుర్తు రెండాకులను తిరిగి తమ సొంతం చేసుకునేందుకు ఎన్నికల సంఘం అధికారికి రూ.60 కోట్ల మేరకు లంచం ఇవ్వబోయినట్టు ఆరోపణలు రావడంతో దినకరన్‌పై ఢిల్లీ పోలీసులు కేసు నమోదు చేశారు. ఈ కేసులోనే టీటీవీ దినకరన్‌పై ఢిల్లీ పోలీసులు లుక్‌అవుట్ నోటీసులు జారీ చేశారు. దేశం విడిచి వెళ్లే అవకాశం ఉన్నట్టు సమాచారం అందడంతో ఈ నిర్ణయం తీసుకున్నట్టు ఢిల్లీ జాయింట్ కమిషనర్ వెల్లడించారు.
ఈ కేసులో పట్టుబడిన కీలక నిందితుడు సుకేశ్ చంద్రశేఖర్ ద్వారా పోలీసులు మరింత లోతుగా సమాచారం రాబడుతున్నారు. ఈయన వద్ద రూ.1.30 కోట్ల నగదును కూడా ఢిల్లీ పోలీసులు స్వాధీనం చేసుకున్న విషయం తెల్సిందే. ఈ కేసులో ఇంకా ఎంతమంది ప్రమేయం ఉందీ.. దినకరన్ తన చుట్టూ ఏర్పాటు చేసుకున్న నెట్‌వర్క్ ఎంతవరకు విస్తరించింది అనే దానిపై కీలక ఆధారాలు రాబట్టినట్టు చెబుతున్నారు.
