తమిళనాడులోని ముఖ్యమంత్రి ఎడప్పాడి కె.పళనిస్వామి ప్రభుత్వం అవినీతి ఊబిలో కూరుకునిపోయిందని డీఎండీకే అధినేత, సినీ నటుడు విజయకాంత్ ఆరోపించారు. ఈ విషయంలో సినీ నటుడు కమల్ హాసన్ నిజమే మాట్లాడారాని ఆయన అభిప్రాయపడ్డారు.
గత కొన్ని రోజులుగా త‌మిళ‌నాడు ప్ర‌భుత్వ ప‌నితీరును సోష‌ల్ మీడియా వేదిక‌గా విల‌క్ష‌ణ నటుడు క‌మ‌లహాస‌న్ ఎండ‌గ‌డుతున్నారు. ఇందులో భాగంగా రాష్ట్రంలో అవినీతి గురించి ఆయన వ్య‌క్తీక‌రిస్తున్న భావాల‌కు అభిమానులు, ప్ర‌తిప‌క్షాలు మ‌ద్ద‌తు ప‌లుకుతున్నాయి. ఇటీవ‌ల అవినీతి గురించిన ఫిర్యాదుల‌ను స‌రాస‌రి సంబంధిత మంత్రుల‌కు ఈ-మెయిల్ చేయాల‌ని ఆయన పిలుపునిచ్చారు.
దీనిపై త‌మిళ‌నాడు మంత్రి వ‌ర్గం విమ‌ర్శ‌ల వ‌ర్షం కురిపించింది. ఈ విమ‌ర్శ‌ల నేప‌థ్యంలో క‌మ‌ల్‌కు మ‌ద్ద‌తునిస్తూ నటుడు కెప్టెన్ విజ‌య్‌కాంత్ ముందుకొచ్చారు. రాజ‌కీయాల్లో కాస్త అనుభ‌వం ఉన్న విజయకాంత్ మాట్లాడుతూ... 'ప్ర‌స్తుతం రాష్ట్రంలో ఉన్న రాజ‌కీయాల గురించి కమల్ నిజం మాట్లాడారు', ఆయన మాట్లాడిన విషయాల్లో ఏమాత్రం తప్పులేదన్నారు.
