అలనాటి తార.. గయ్యాళి అత్త పాత్రల్లో కనిపించిన సూర్యకాంతం.. స్వతహాగా ఆమె ఎంతో మంచిది. ప్రతిరోజూ తన ఇంటి నుంచి వంట చేసుకుని వచ్చి తోటి ఆర్టిస్టులతో పాటు లైట్ బాయ్‌లకు కూడా ఉంచేదట. జయలలితకు సూర్యకాంతం చేసే పులిహోర అంటే చాలా ఇష్టమట. ఒకరోజు షూటింగ్‌ స్పాట్‌కు సూర్యకాంతం పులిహోర చేసి తీసుకువచ్చిందట. దాంతో ఉదయం షూటింగ్‌ మొదలైనప్పటి నుంచి జయలలిత దృష్టంతా పులిహోర మీదే ఉందట.
ఎప్పుడు బ్రేక్‌ ఇస్తారా.. ఎప్పుడు పులిహోర తిందామా అని ఆమె ఎదురుచూసేదట. బ్రేక రాగానే పరిగెత్తుకుంటూ.. వెళ్ళి పులిహోర తినడం ప్రారంభించేదట. అలా వేగంగా పులిహోర తీసుకోవడం ద్వారా అమ్మకు ఎక్కిళ్లు వచ్చాయట. పక్కనే ఉన్న సూర్యకాంతం గ్లాస్‌తో నీళ్లిచ్చి ప్రేమగా తట్టిందట. ఆ సమయంలో సూర్యకాంతంలో తన తల్లిని జయలలిత చూసుకుందట. ఇక, సూర్యకాంతం చనిపోయే సమయానికి జయలలిత తమిళనాడు ముఖ్యమంత్రిగా ఉన్నారు.
