తమిళనాడు సీఎం జయలలితను అపోలో వైద్యులు 24 గంటల పాటు అబ్జర్వేషన్లో ఉంచారు. జయలలితకు 'ఎక్స్ ట్రాకార్పోరియల్ ముంబ్రేన్ హార్ట్ అసిస్టెడ్ డివైజ్' అమర్చారని, ప్రత్యేక వైద్య నిపుణులు పర్యవేక్షణలో చికిత్స చేస్తున్నారని సమాచారం. జయలలితకు ఎలాంటి చికిత్స అందించాలన్న విషయంపై లండన్ వైద్యుడు డాక్టర్ రిచర్డ్ బాలేని ఎప్పటికప్పుడు అపోలో వైద్యులు సంప్రదిస్తున్నారని సమాచారం.
తమిళనాడు ముఖ్యమంత్రి జయలలితకు వచ్చినది గుండెపోటు కాదని.. ఆమె గుండె కొద్దిసేపు ఆగిందని (కార్డియాక్ అరెస్ట్) అపోలో ఆస్పత్రి వర్గాలు విడుదల చేసిన నోట్లో పేర్కొన్నాయి. ఈ కారణంగానే ఆమెకు సోమవారం ఉదయం ఒక ఆపరేషన్ కూడా జరిగినట్లు పార్టీ ప్రతినిధి సీఆర్ సరస్వతి తెలిపారు. కార్డియాక్ అరెస్టుకు, గుండెపోటుకు నిజానికి చాలా తేడా ఉంది. ఆ విషయాన్ని తెలుసుకోవాల్సిన అవసరం ఉంది.
శరీరంలోని వివిధ భాగాలకు రక్తసరఫరాను గుండె ఆపేసినప్పుడు కార్డియాక్ అరెస్టు సంభవిస్తుంది. పేషెంటు ఉన్నట్టుండి కుప్పకూలి, సాధారణంగా ఊపిరి తీసుకోకపోవడం, స్పందనలు లేకపోవడం లాంటి లక్షణాలు ఇందులో సంభవిస్తాయని వైద్యులు చెప్తున్నారు.