ప్రభుత్వం అందించే డబ్బుల కోసం ఉత్తుత్తి పెళ్లిళ్లు జరుగుతున్నాయి. ఈ వివాహాల పేరుతో ప్రభుత్వ సొమ్మును అప్పనంగా బొక్కేస్తున్నారు. ఈ తంతు భారతీయ జనతా పార్టీ పాలిత రాష్ట్రమైన ఉత్తరప్రదేశ్ రాష్ట్రంలో బలియా జిల్లాలో జరిగింది. తాజాగా వెలుగులోకి వచ్చిన ఈ వివరాలను పరిశీలిస్తే,
ఈ రాష్ట్రంలో పేద యువతుల పెళ్లిళ్ల కోసం ఉత్తరప్రదేశ్ ప్రభుత్వం ముఖ్యమంత్రి సామూహిక వివాహ వేడుక పథకాన్ని ప్రారంభించింది. ఈ పథకం కింద నిరుపేద కుటుంబాల యువతీ యువకులకు ఆర్థిక సాయం కింద రూ.51,000 ఇస్తుంది. అక్రమంగా లబ్ది పొందాలనే దురాశతో కొందరు అధికారులు దళాతులతో కుమ్మక్కయ్యారు. ఆ మేరకు జనవరి 25వ తేదీన మునియర్ పట్టణ కళాశాలలో నిర్వహించిన ప్రభుత్వ సామూహిక వివాహ కార్యక్రమానికి నకిలీ వధూవరులను తీసుకొచ్చారు.
పెళ్లికాని, పళ్లయిన యువతీ యువకులకు డబ్బు ఎర చూపారు. ఒప్పందం ప్రకారం వీరంతా ఉత్తుత్తి పెళ్లిళ్లు చేసుకుంటారు. ఈ దృశ్యాలు టీవీల్లో వైరల్ కావడంతో అసలు విషయం బహిర్గతమైంది. దీంతో పోలీసు ఉన్నతాధికారులు రంగంలోకి దిగి ఎనిమిది మంది అధికారులపై కేసులు నమోదు చేశారు. అయితే, ఈ సామూహిక పెళ్ళిళ్ళు చేసుకున్న దంపతులకు ఇంకా నిధులు విడుదల చేయలేదని జిల్లా పాలనాధికారి రవీంద్ర కుమార్ తెలిపారు.
