ఈ సందర్భంగా ప్రధాని మోడీ కీలక వ్యాఖ్యలు చేశారు. ఇక రాబోయే రోజుల్లో ఫేస్ మాస్కులు, ఫేస్ కవర్లు ధరించడం మన జీవితంలో భాగం కావొచ్చని అభిప్రాయపడ్డారు. మరోవైపు, కోవిడ్-19పై పోరాటం సాగిస్తూనే ఆర్థిక వ్యవస్థకు ప్రాధాన్యం ఇవ్వాల్సిన అవసరం ఉందని గుర్తుచేశారు.
ముఖ్యమంత్రులతో జరిగిన సమావేశంలో మోడీ మాట్లాడుతూ, "ఇంతవరకూ మనం రెండు లాక్‍డౌన్లు చూశాం. ప్రస్తుతం మనం ఏవిధంగా ముందుకు వెళ్లాలనేది ఆలోచించాలి. నిపుణుల అభిప్రాయం ప్రకారం, కరోనా వైరస్ ప్రభావం రాబోయే నెలల్లోనూ కనిపిస్తుంది. మునుముందు కూడా రోజువారీ జీవితంలో అంతా మాస్క్‌లు ధరించడం అనివార్యం కావచ్చు" అని మోడీ అన్నారు.
లాక్‌డౌన్‌తో సానుకూల ఫలితాలు వచ్చాయని, గత నెలన్నరగా వేలాది మంది ప్రాణాలను కాపాడగలిగామని మోడీ చెప్పారు. పలు దేశాల జనాభా అంతా కలిపితే ఎంతో భారత్ జనాభా అంతని అన్నారు. మార్చి ప్రారంభంలో ఇండియాతో సహా చాలా దేశాల్లో పరిస్థితి దాదాపు ఒకేలా ఉందని చెప్పారు.
'ప్రస్తుత పరిస్థిత్లో ప్రతి ఒక్కరూ శీఘ్రగతిన స్పందించడం ముఖ్యం. చాలా మంది ప్రజలు దగ్గు, జలులు, ఇతర లక్షణాలు కనిపిస్తే వెంటనే స్పందిస్తున్నారు. ఇది ఆహ్వానించదగిన పరిణామం' అని ప్రధాని అన్నారు. హాట్‌స్పాట్‌లు, రెడ్‌స్పాట్‌లో విషయంలో అనుసరించాల్సిన నిబంధనలను రాష్ట్రాలు కఠినంగా అమలు చేయాలని కూడా ముఖ్యమంత్రులకు మోడీ సూచించారు.
