ప్రపంచ మహిళా దినోత్సవం సందర్భంగా నిర్భయ తల్లికి అవమానం జరిగింది. అదీ కూడా ఓ రాష్ట్ర డీజీపీగా పని చేసి రిటైర్డ్ అయిన వ్యక్తి ఆమెను అవమానించారు. ఈ విషయం ఆలస్యంగా వెలుగులోకి వచ్చింది. ఈ వివరాలను పరిశీలిస్తే,
ఈ నెల 8న బెంగళూరులో 'నిర్భయ అవార్డ్స్ 2018' కార్యక్రమం జరిగింది. దీనికి కర్ణాటక మాజీ డీజీపీ హెచ్‌టీ సంగ్లియానా ముఖ్య అతిథిగా పాల్గొన్నారు. ఇందులో ఆయన మాట్లాడుతూ, 'నేను ఆమెను (నిర్భయ తల్లి) చూసినప్పుడు ఆమె మంచి శరీర సౌష్టవంతో కనిపించింది. ఆమే అంత అందంగా ఉంటే నిర్భయ ఇంకెంత అందంగా ఉండివుంటుందో ఊహించండి' అంటూ అనుచిత వ్యాఖ్యలు చేశారు.
ఆయన మాటలు వినగానే ఆ కార్యక్రమానికి వచ్చిన చాలా మంది మహిళలు ఆగ్రహంతో బయటికి వెళ్లిపోయారు. నిర్వాహకులు చెవిలో ఏదో చెబుతూ ఆయనను వారించే ప్రయత్నం చేసినప్పటికీ.. ఆయన అలాగే దాదాపు 20 నిమిషాలు మాట్లాడటం గమనార్హం. ప్రస్తుతం ఆయన ప్రసంగం వీడియో రూపంలో బయటికి రావడంతో నెటిజన్లు తీవ్ర ఆగ్రహం వ్యక్తం చేస్తున్నారు.
