ముఖ్యమంత్రిగా అధికారంలోకి వచ్చిన తర్వాత ప్రజారంజక పాలన సాగిస్తూ, ప్రతి ఒక్కరితో శభాష్ అనిపించుకుంటున్న డీఎంకే అధ్యక్షుడు, తమిళనాడు ముఖ్యమంత్రి ఎంకే స్టాలిన్ మరోమారు ప్రతి ఒక్కరితో శభాష్ అనిపించుకున్నారు. తన కాన్వాయ్‌ను రోడ్డుపక్కకు వెళ్లమని అంబులెన్స్ వాహనం వెళ్లేందుకు దారిచ్చారు. ఇది సోషల్ మీడియాతో పాటు టీవీల్లో ప్రసారం కావడంతో ప్రతి ఒక్కరూ ఆయనపై ప్రశంసలు కురిపిస్తున్నారు. తన చేతలతో మరోమారు ఆయన పెద్ద మనస్సును చాటుకున్నారంటూ కితాబిస్తున్నారు. తన కాన్వాయ్ వెళ్తుండగా అంబులెన్స్‌కు దారి ఇచ్చి గొప్పతనాన్ని చాటుకున్నారు స్టాలిన్.
సోమవారం వేళచ్చేరి మార్గంలో సీఎం కాన్వాయ్ వెళుతుండగా, వెనుక నుంచి ఓ అంబులెన్స్ వేగంగా దూసుకువచ్చింది. ఇది గమనించిన ముఖ్యమంత్రి స్టాలిన్ అప్రమత్తమయ్యారు. వెంటనే స్పందించిన సీఎం వేగంగా వెళ్తున్న ఆ అంబులెన్స్ కోసం ముఖ్యమంత్రి వాహ‌న‌శ్రేణి దారిని ఇచ్చింది. ఎడ‌మ వైపు కాన్వాయ్‌ను ఆపి.. అంబులెన్స్‌కు మార్గాన్ని క‌ల్పించారు.
