వాహనదారులకు నేషల్ హైవేస్ అథారిటీ ఆఫ్ ఇండియా (ఎన్.హెచ్.ఏ.ఐ) శుభవార్త చెప్పింది. టోల్ బూత్‌ల వద్ద ఇకపై రుసుం చెల్లించనక్కర్లేదని పేర్కొంది. అయితే, ఇక్కడో మెలిక వుంది. వంద మీటర్ల దూరంలో ఉండే పసుపు గీతలను తాకుతూ వాహనాల క్యూ ఉంటే.. ఈ టోల్‌చార్జి చెల్లించనక్కర్లేదని పేర్కొంది.
ఇలాంటి వాహనదారుల కష్టాలు తీర్చేందుకు ఎన్‌హెచ్‌ఏఐ కీలక నిర్ణయం తీసుకుంది. ప్రతి టోల్ వద్ద 100 మీటర్ల దూరంలో పసుపు గీతలు గీయనున్నట్లు వెల్లడించింది. టోల్ రుసుము చెల్లించేందుకు క్యూలో ఉన్న వాహనాలు ఈ గీతను తాకితే చాలు.. టోల్ నిర్వాహకులు వరసలో ఉన్న వాహనాలన్నింటినీ రుసుము వసూలు చేయకుండానే పంపేయాల్సి ఉంటుంది. ఈ మేరకు బుధవారం ఎన్‌హెచ్‌ఏఐ మార్గదర్శకాలు విడుదల చేసింది.
టోల్ ప్లాజాల వద్ద నిరీక్షణ సమయాన్ని తగ్గించేందుకే ఈ నిర్ణయం తీసుకున్నట్లు తెలిపింది. అలాగే, ఒక్కో వాహనానికి రుసుము వసూలు లావాదేవీ సమయాన్ని 10 సెకన్లకు మించకుండా చూడనున్నట్లు వివరించింది. వాహనాల రద్దీ ఎక్కువగా ఉండే సమయంలోనూ 10 సెకన్లలోనే లావాదేవీలు ముగించేలా చూసేందుకే ఈ నిర్ణయం తీసుకున్నట్లు వెల్లడించింది.
