కానీ, ఇంతవరకూ కరీంనగర్, ఖమ్మం, హైదరాబాద్ అభ్యర్థుల పేర్లను కాంగ్రెస్ కేంద్ర ఎన్నికల కమిటీ ఇంకా ప్రకటించలేదు. ఈ లోక్‌సభ నియోజకవర్గాల్లో అభ్యర్థులెవరో తెలియక ప్రచారం అంతంతమాత్రంగా ఉంది. కరీంనగర్‌లో భారతీయ జనతా పార్టీ కీలక నేత బండి సంజయ్, భారత రాష్ట్ర సమితి అభ్యర్థి వినోద్ కుమార్ కొద్ది రోజులుగా విస్తృతంగా ప్రచారం చేస్తున్నారు.
వీరిని ఢీకొనే అభ్యర్థిని ఇంకా కాంగ్రెస్ ప్రకటించలేదు. వచ్చే నెల 11వ తేదీతో ముగిసే ప్రచారానికి ఇంకా కేవలం 25 రోజులే గడువుంది. ఈ మూడు స్థానాల అభ్యర్థుల పేర్లపై ఈ నెల 14వ తేదీన హైదరాబాద్ నగరానికి వచ్చిన కాంగ్రెస్ జాతీయ ప్రధాన కార్యదర్శి కేసీ వేణుగోపాల్‌తో సీఎం రేవంత్ రెడ్డి, పార్టీ రాష్ట్ర ఇన్‌చార్జ్ దీపా దాసునీ చర్చించినట్లు సమాచారం.
కాంగ్రెస్ అగ్రనేత ప్రియాంకా గాంధీ ఖమ్మం నుంచి పోటీ చేయాలని సీఎం ఇంతకుముందే కోరారు. అయితే ఆమె ఖమ్మం బరిలో దిగే అవకాశాలు లేవని కేసీ వేణుగోపాల్ స్పష్టం చేసినట్లు సమాచారం. మంత్రి పొంగులేటి సోదరుడు ప్రసాద రెడ్డి లేదా రఘురామి రెడ్డిలలో ఒకరిని ఖమ్మం అభ్యర్థిగా ఎంపిక చేసే అవకాశాలున్నట్లు పార్టీ వర్గాల అంచనా.
