లోన్ యాప్ ఏజెంట్ల వేధింపులు తట్టుకోలేక హనుమకొండ జిల్లా భీమదేవరపల్లి మండలం ముల్క్‌నూర్ గ్రామంలో ఆదివారం 29 ఏళ్ల యువకుడు ఆత్మహత్య చేసుకున్నాడు.
ముల్క్‌నూర్‌లో ఫాస్ట్‌ఫుడ్‌ దుకాణం నడుపుతున్న మాడుగుల అనిల్ ఆన్‌లైన్‌ లోన్ యాప్ నుంచి రూ.9 లక్షలు అప్పుగా తీసుకున్నట్లు సమాచారం. అయితే ఆర్థిక ఇబ్బందుల కారణంగా గత నెల వాయిదా చెల్లించలేకపోయాడు.
దీంతో లోన్ యాప్ ఏజెంట్లు వాయిదా చెల్లించాలంటూ అతనిపై ఒత్తిడి తెచ్చారు. రోజురోజుకు రుణ ఏజెంట్ల వేధింపులు పెరుగుతుండటంతో అనిల్ ఆదివారం ఉదయం పురుగుల మందు తాగాడు.
కుటుంబ సభ్యులు అతడిని ఎంజీఎం ఆస్పత్రికి తరలించగా చికిత్స పొందుతూ మృతి చెందాడు. పోలీసులు కేసు నమోదు చేసి దర్యాప్తు జరుపుతున్నారు.
