నేడు ఢిల్లీకి రేవంత్.. రేపు రాహుల్ సమక్షంలో కాంగ్రెస్ సభ్యత్వం

తెలంగాణ ఫైర్ బ్రాడ్ రేవంత్ రెడ్డి కాంగ్రెస్ పార్టీలో చేరడం ఖాయమైపోయింది. ఇందుకోసం ఆయన సోమవారం సాయంత్రం ఢిల్లీకి వెళ్లనున్నారు. ఆ తర్వాత మంగళవారం అంటే 31వ తేదీ మధ్యాహ్నం రాహుల్ గాంధీతో సమావేశమై మూడు రంగుల కండువాను కప్పుకోనున్నారు. 

ఇదిలావుండగా, రేవంత్‌రెడ్డి ఈ నెల 31న ఢిల్లీలో రాహుల్‌ సమక్షంలో కాంగ్రెస్‌లో చేరే అవకాశముందన్నారు. కాంగ్రెస్‌లో ఎవరు చేరినా స్వాగతిస్తామని ఆ పార్టీ నేతలు చెబుతున్నారు. కాగా ఇప్పటికే రేవంత్‌ పేరిట ఢిల్లీలోని కర్ణాటక భవన్‌లో 30 గదులను ఆ రాష్ట్ర కాంగ్రెస్‌ ముఖ్యనేత ఒకరు బుక్‌ చేసినట్లు విశ్వసనీయ వర్గాల సమాచారం.

మరోవైపు... రేవంత్‌రెడ్డి రాకను రాష్ట్ర నేతలెవరూ వ్యతిరేకించడంలేదని కాంగ్రెస్‌ రాష్ట్ర వ్యవహారాల ఇన్‌చార్జి ఆర్‌సీ కుంతియా అన్నారు. నవంబరులో రాహుల్‌ గాంధీ తెలంగాణలో పర్యటిస్తారని తెలిపారు. ఆ సమయంలో రేవంత్ నియోజకవర్గం కొడంగల్‌లో భారీ బహిరంగ సభ నిర్వహించేలా రేవంత్ ప్లాన్ చేసినట్టు సమాచారం.