సంగారెడ్డి జిల్లా శివారు ప్రాంతమైన పుల్కల్‌ మండలం చౌటకూర్‌కు చెందిన చాకలి జగన్‌(27), తల్లి పార్వతమ్మతో కలిసి తాటి ముంజలను అమ్మడానికి సంగారెడ్డికి వచ్చారు. తిరిగి ఆటోలో చౌటకూర్‌కు వెళ్తుండగా వైకుంఠపురం సమీపంలోకి రాగానే నారాయణఖేడ్‌ డిపోకు చెందిన బస్సు హైదరాబాద్‌ వెళ్తున్న క్రమంలో ఆటోలో ఉన్న జగన్‌ కాలును బస్సు ఢీకొట్టింది.
ఈ ప్రమాదంలో కాలు విరిగింది. విరిగిన కాలును బస్సు అర కిలోమీటర్‌ వరకు లాక్కెళ్లింది. తల్లి పార్వతమ్మ ఆర్తనాదాలు విన్న స్థానికులు 108కు సమాచారం ఇచ్చారు. జగన్‌ విరిగిన కాలును స్వాధీనం చేసుకుని జిల్లా కేంద్ర ఆస్పత్రికి తరలించారు. చికిత్స అనంతరం సికింద్రాబాద్‌లోని గాంధీ ఆస్పత్రికి తరలించారు. బస్సు డ్రైవర్‌ను పోలీసులు అదుపులోకి తీసుకున్నారు.
