తెలంగాణ టీడీపీ వర్కింగ్ ప్రెసిడెంట్ రేవంత్ రెడ్డికి ఆ పార్టీ రాష్ట్ర శాఖ అధ్యక్షుడు ఎల్.రమణ నుంచి అనూహ్య ప్రశ్న ఎదురైంది. పార్టీలో ఉంటారా? పోతారా? ఏదో ఒకటి స్పష్టం చేయాలంటూ నిలదీశారు. దీంతో శుక్రవారం హైదరాబాద్ వేదికగా జరుగుతున్న టీ టీడీపీ పొలిట్ బ్యూరో, కేంద్ర కమిటీ సమావేశం హాట్‌హాట్‌గా సాగుతోంది.
టీడీపీ ఫైర్ బ్రాండ్ రేవంత్ రెడ్డి కాంగ్రెస్ పార్టీలో చేరడం ఖాయమనే వార్తలు హల్‌చల్ చేస్తున్నాయి. ఈ పరిస్థితుల్లో బంజారాహిల్స్‌లోని తెలుగుదేశం పార్టీ ప్రధాన కార్యాలయంలో టీటీడీపీ వర్కింగ్ కమిటీ సమావేశం జరుగగా, అంచనాలను తలకిందులు చేస్తూ రేవంత్ రెడ్డి వచ్చారు. ఆయన్ను చూడగానే పలువురు అభిమానులు ఎదురెళ్లి స్వాగతం పలికారు.
నవ్వుతూ లోపలికి వచ్చి వర్కింగ్ కమిటీ సమావేశానికి వెళ్లిన రేవంత్‌ను, పార్టీ రాష్ట్ర అధ్యక్షుడు ఎల్.రమణ కాస్తంత గట్టిగానే నిలదీసినట్టు తెలుస్తోంది. కాంగ్రెస్‌లో చేరుతున్నట్టు వచ్చిన వార్తల గురించి ప్రస్తావించిన ఆయన, అసలేం అనుకుంటున్నారో నిజం చెప్పాలని నిలదీసినట్టు పార్టీ వర్గాలు వెల్లడించాయి.
పార్టీ మారాలని భావిస్తే, అసలు ఈ సమావేశానికి రాకుండా ఉండాల్సిందని కూడా ఆయన అన్నట్టు సమాచారం. ఇక తాను పార్టీ మారుతున్నట్టు ఎన్నడైనా, ఎక్కడైనా చెప్పానా? అని ఎల్.రమణను ఎదురు ప్రశ్నించిన రేవంత్, కేసీఆర్ ప్రభుత్వ వైఫల్యాలను ఎండగట్టడంలో టీడీపీ విఫలమవుతోందని ఆరోపించినట్టు సమాచారం. మొత్తంమీద ఈ సమావేశానికి రేవంత్ రెడ్డి హాజరుకావడం ఇపుడు పెద్ద చర్చనీయాంశంగా మారింది.
