అక్కినేని నాగ చైత‌న్య హీరోగా మారుతి ద‌ర్శ‌క‌త్వంలో రూపొందిన ఫ్యామిలీ ఎంట‌ర్టైన‌ర్ శైల‌జారెడ్డి అల్లుడు. సితార ఎంట‌ర్టైన్మెంట్స్ సంస్థ ఈ భారీ చిత్రాన్ని నిర్మించింది. వినాయ‌క చ‌వితి సంద‌ర్భంగా రిలీజైన శైల‌జారెడ్డి అల్లుడు చిత్రానికి భారీ స్థాయిలో ఓపెనింగ్ క‌లెక్ష‌న్స్ వ‌చ్చాయి. అయితే... ఈ సినిమా సినీ విమ‌ర్శ‌కుల‌కు అంత‌గా న‌చ్చ‌లేదు. అందుకే చాలా రివ్యూస్ నెగిటివ్ గానే వ‌చ్చాయి. ఆ ప్ర‌భావం ఓవ‌ర్సీస్ క‌లెక్ష‌న్స్ పైన ప‌డింది. అక్క‌డ ఆశించిన స్ధాయిలో క‌లెక్ష‌న్స్ రాలేదు.
తెలుగు రాష్ట్రాల్లో మాత్రం ఊహించిన దానికంటే ఎక్కువ క‌లెక్ష‌న్స్ వ‌సూలు చేస్తుండ‌టం విశేషం. 3 రోజుల‌కు 23 కోట్లు గ్రాస్ క‌లెక్ట్ చేసింది. ఈ సంద‌ర్భంగా హైద‌రాబాదులో ఏర్పాటు చేసిన స‌క్స‌స్ మీట్లో నాగ చైత‌న్య మాట్లాడుతూ... తెలుగు ప్రేక్ష‌కులు ఈ సినిమాని ఆద‌రించి మంచి ఓపెనింగ్ ఇచ్చారు. స‌పోర్ట్ చేసిన ప్రేక్ష‌కుల‌కు, ఫ్యాన్స్‌కి నా థ్యాంక్స్. ఈ సినిమాతో ఫిల్మ్ క్రిటిక్స్‌ని సంతృప్తిప‌ర‌చ‌లేక‌పోయినందుకు సారీ చెబుతున్నాను. నా నెక్ట్స్ మూవీకి మ‌రింత క‌ష్ట‌ప‌డ‌తాను. మీకు న‌చ్చేలా సినిమా చేస్తాన‌న్నారు.
