సీనియర్ హీరో సుమన్ నటించిన ‘బందిపోటు’ మూవీ 33 ఏళ్లు పూర్తి చేసుకుంది. తెలుగు తెరపై హీరోగా పలు చిత్రాల్లో నటించి విజయాలు అందుకున్న సీనియర్ హీరో సుమన్ నటించిన యాక్షన్ మూవీ ‘బందిపోటు’. అన్నపూర్ణ సినీ చిత్ర బ్యానర్‌పై కాట్రగడ్డ ప్రసాద్ సమర్పణలో టీఆర్ తులసి ఈ చిత్రాన్ని నిర్మించారు. బి.ఎల్వీ. ప్రసాద్ దర్శకత్వం వహించిన ‘బందిపోటు’ చిత్రం 1988 ఆగస్టు 4న విడుదలైంది. గౌతమి, కల్పన, పూర్ణిమ, శివకృష్ణ, కోటాశ్రీనివాసరావు, నూతన్ ప్రసాద్, సుత్తి వీరభద్రరావు, రంగనాథ్, నర్రా వేంకటేశ్వరరావు, డిస్కో శాంతి, చంద్రిక, మోహన్ కుమార్, వినోద్, ఓంకార్ తదితరులు కీలక పాత్రల్లో నటించిన ఈ చిత్రానికి రాజ్-కోటి సంగీతం అందించారు. వేటూరి సుందరరామ్మూర్తి సాహిత్యం అందించిన ఈ చిత్రం పాటలు హిట్‌గా నిలిచి సినిమా విజయంలో కీలక పాత్ర పోషించాయి. ఈ చిత్రంతో సుమన్‌కు కూడా హీరోగా మంచి పేరు వచ్చిన విషయం తెలిసిందే. ఈ చిత్రం ముహూర్తం షాట్‌కు మెగాస్టార్ చిరంజీవి గెస్ట్‌గా వచ్చి విష్ చేయడం విశేషం.
