విజయ్‌ దేవరకొండ, రష్మిక మందన్న జంటగా నటించిన చిత్రం 'గీత గోవిందం'. ఈ చిత్రం ఇటీవల విడుదలై సూపర్ హిట్ టాక్‌ను సొంతం చేసుకుంది. అంతేనా రెండు తెలుగు రాష్ట్రాల్లో కాసుల వర్షం కురిపిస్తోంది. ఇదే జోరును ఓవర్సీస్‌లో కూడా కొనసాగిస్తోంది.
అందరి అంచనాలను నిజం చేస్తూ 'గీత గోవిందం' బాక్సాఫీసును షేక్ చేస్తోంది. తెలుగు రాష్ట్రాలతో పాటు ఓవర్‌సీస్‌లోనూ ఈ చిత్రాన్ని ఆదరిస్తున్నారు. దీంతో ఈ సినిమా అమెరికాలో 2 మిలియన్‌ డాలర్ల క్లబ్‌లో చేరినట్లు సినీ విశ్లేషకుడు రమేష్‌ బాలా ప్రకటించారు. దీనికి సంబంధించిన పోస్టర్‌ను ఆయన ట్వీట్‌ చేశారు. ఈ చిత్రం దెబ్బకు బాలీవుడ్ చిత్రాలకు సైతం కలెక్షన్లు పడిపోయాయి.
కాగా, 'గీత గోవిందం' సినిమాకు పరుశురాం దర్శకత్వం వహించారు. జీఏ2 (గీతా ఆర్ట్స్ 2) పిక్చర్స్‌ పతాకంపై బన్నీ వాసు నిర్మించారు. అల్లు అరవింద్‌ సినిమాను సమర్పించారు. గోపీ సుందర్‌ బాణీలు అందించారు. రష్మిక మందన్న హావభావాలకు సినీ ప్రేక్షకులు ఫిదా అయిపోయారు.
