మాస్‌ చిత్రాల దర్శకుడు బి.గోపాల్‌, గోపీచంద్‌తో చేస్తున్న సినిమా టైటిల్‌ ప్రకటించనున్నారు. కొద్దికాలంగా విరామం ఇచ్చిన ఈ చిత్రం షూటింగ్‌ మరలా కొనసాగుతోంది. నయనతార కథానాయికగా నటిస్తున్న ఈ చిత్రానికి మణిశర్మ బాణీలు సమకూర్చారు. చిత్రం గురించి నిర్మాత తాండ్ర రమేష్‌ మాట్లాడుతూ గోపీచంద్‌, నయనతార కాంబినేషన్‌లో బి.గోపాల్‌ దర్శకత్వంలో రూపొందుతోన్న ఈ చిత్రం యాక్షన్‌ ఎంటర్‌టైనర్‌గా రూపొందుతోంది.
దాదాపు షూటింగ్‌ ముగింపు దశకు చేరుకున్న ఈ చిత్ర టైటిల్‌ను ఫస్ట్‌లుక్‌ను దీపావళికి విడుదల చేయబోతున్నాం. పాటలను నవంబర్‌లోనూ సినిమాను డిసెంబర్‌లోనూ విడుదల చేసేందుకు సన్నాహాలు జరుగుతున్నాయి. మరోవైపు నిర్మాణానాంతర కార్యక్రమాలు చురుగ్గా సాగుతున్నాయి. సీనియర్‌ టెక్నీషియన్లు ఈ చిత్రానికి పనిచేస్తున్నారని తెలిపారు.
ప్రకాష్‌రాజ్‌, కోట శ్రీనివాసరావు, బ్రహ్మానందం, అభిమన్యు సింగ్‌, ఉత్తేజ్‌, జయప్రకాష్‌ రెడ్డి, రమాప్రభ తదితరులు నటిస్తున్న ఈ చిత్రానికి వక్కంతం వంశీ, అబ్బూరి రవి సంభాషణలు రాస్తున్నారు. కెమెరా: బాలమురుగన్‌, ఫైట్స్‌: కణల్‌ కన్నన్‌.
