తెలుగు చిత్ర పరిశ్రమే కాదు.. యావత్ ప్రపంచ సినిమా స్థాయి, భాషల భేదాలు లేకుండా పైరసీల బారిన పడటం పాత విషయం. ఇప్పుడు అందర్నీ బెంబేలెత్తిస్తున్న సమస్య ఒకటే - లీక్. సినిమా పోస్ట్ ప్రొడక్షన్ పనుల్లో ఉన్నప్పుడో, లేకుంటే షూటింగ్‌లో ఉన్నప్పుడో, డబ్బింగ్ దశలోనో, రీరికార్డింగ్‌లోనో.. అక్కడ ఇక్కడ అని లేకుండా ఎక్కడపడితే అక్కడ లీకువీరులు జూలు విదుల్చుతున్నారు.
బాహుబలి-2 తర్వాత ప్రభాస్ నటిస్తున్న చిత్రం సాహో. ఇన్నేళ్ల కెరీర్లో ఇది ప్రభాస్‌కు 19వ సినిమా. ఈ చిత్రం షూటింగ్ ఇప్పటికే ప్రారంభమైంది. బాహుబలి-2 సినిమా విడుదల రోజున అంటే ఏప్రిల్ 28న సాహో టీజర్‌ను రిలీజ్ చేయాలనుకున్నారు ప్రొడ్యూసర్లు. అయితే ఏ మహానుభావుడో ఆ టీజర్‌ను సైతం రికార్డు చేసి, సోషల్ మీడియాలో వదిలేసాడు. ఆ తర్వాత ప్రొడ్యూసర్లు అప్రమత్తమై అన్ని సైట్ల నుండి ఈ లీకైన టీజర్‌ను తీసేసినా, జరగాల్సిన డ్యామేజీ అప్పటికే జరిగిపోయింది. ప్రభాస్ ఒంటికి అంటిన రక్తం తుడుచుకుంటూ, "ఇట్స్ షో టైమ్" అంటూ కేవలం ఒకే ఒక్క డైలాగ్‌తో ఫ్యాన్స్ మతిపోగెట్టేసిన ఈ టీజర్‌ను వేలాదిమంది చూసేసారు.
ఇక టీజర్ విషయానికొస్తే, బాహుబలిలో చక్రవర్తి గెటప్‌లో పెరిగిన జుత్తు, మెలితిప్పిన మీసాలతో రాజసంగా కనిపించిన ప్రభాస్ ఇందులో పూర్తి డిఫరెంట్ గెటప్‌లో కనిపించాడు. ప్రభాస్ తొలిసారి పోలీస్ ఆఫీసర్‌గా కనిపించనున్న ఈ సినిమా తెలుగు, తమిళంతో పాటు హిందీలోనూ రిలీజ్ కానుంది.
